"QazAtomÓnerkásip" kompanııasynyń burynǵy basshysy Muhtar Jákishev belgili medıa menedjer Armanjan Baıtasovtyń Baitassov LIVE Youtube arnasyna bergen suhbatynda Úkimettiń aldaǵy ýaqytta atqarýy tıis jumysy men eldegi qaýipsizdikti qalpyna keltirý sharalaryna jete toqtaldy. Sonymen qatar "Qasiretti qańtar" oqıǵasyna qatysty pikir bildirip, bılikke úndeý tastady, dep habarlaıdy "Adyrna" ulttyq portaly.
- Birinshiden, qoǵamymyzdaǵy jikke bólinýshilik tereńdep ketpeýi úshin eń aldymen ne isteý kerek? Men qazir óz otandastarynyń taǵdyry boıynsha sheshim qabyldaǵandardyń barlyǵyna ótinish aıtqym keledi. Sheshim qabyldaǵanda, bul sizdiń otandastaryńyz ekenin birinshi orynǵa qoıýyńyz kerek. Olardyń ornynda siz de bolýyńyz múmkin, olar da sizdiń ornyńyzda bolýy múmkin. Biraq bul sizdiń halqyńyz. Sizde basqasy joq. Sondyqtan, siz sheshim qabyldaı otyryp, kinásiz adamdy ádiletsiz sottap jatqanyna sál de bolsyn kúmándansańyz, ony sizdiń otandastańyz bolyp tabylatyn jaqyn adamnyń paıdasyna qaraı dáleldeńiz. Sizde odan basqa jaqyn adam joq. Birde-bir franýz, birde-bir amerıkandyq sizben birge bir elde turatyn adamnan jaqyn bola almaıdy. Bizdiń maqsattarymyz bir, balalarymyz bir elde turady. Siz de osy elde turýdy josparlap otyrsyz. Biz bárimiz balalarymyz laıyqty elge ıe bolýy úshin memleketimizdiń jaqsy jaqqa ózgergenin qalaımyz. Osyny eske saqtaǵanymyz jón, - dep pikir bildirdi Muhtar Jákishev.
Onyń oıynsha, elimizde "Qasiretti qańtar" oqıǵasyna qatysty oryn alǵan jaǵdaılarǵa beıbit mıtıngige shyqqan otandastarymyzdy jappaı kinálap, olarǵa "terrorıst" degen aýyr aıyp taǵý durys emes.
- Qazir baspasóz betterinde elimizde jappaı azaptaý oryn alyp jatqany, beıbit mıtıngige shyqqan adamdardy terrorıster sanatyna aýystyryp jatqany jáne t.b. týraly kóp aqparat bar. Bir nárseni esińizge saqtańyz, bul eshkimge qajet emes! Qazir siz terrorıst retinde kórsetkińiz keletin adamdar áriptesterińizdiń ólimine, oryn alǵan oqıǵalarǵa kináli emes. Buǵan naǵyz zulymdyq dep alatyn úshinshi kúsh kináli. Al narazylyq bildirýshiler men tártip saqshylary tarapynan zardap shekken adamdar, shyn máninde osy úshinshi kúshtiń qyrǵynǵa, ólimge bergen zeńbirek eti... Sebebi quqyq qorǵaý organdarynyń qurbandary bolmasa, ol qandaı búlik ? Sondyqtan olarǵa óz josparlaryn júzege asyrý úshin qurbandyq qajet boldy. Tártip saqshylary tarapynan da, beıbit turǵyndar tarapynan da. Túsinip otyrsyz ǵoı. Olar sizdiń jaýlaryńyz emes ekenin óte jaqsy túsinýińiz kerek. Bul sizdiń otandastaryńyz. Sondyqtan sizge qandaı qarym-qatynas jasaǵanyn qalasańyz, sizde olarǵa sondaı qarym-qatynas jasańyz. Meniń osy bir tilegim bizdiń qoǵamymyzdy, bizdiń ulttyq ıdeıamyzdy nyǵaıtyp, alǵashqy qadam jasaýǵa múmkindik beredi dep oılaımyn. Óıtkeni reforma úshin bizge toptasý kerek. Bul toptasý kez kelgen jaǵdaıda birinshi qadamnan bastaý alady. Osy alǵashqy qadamdy jasaıyq. Sebebi, búgin jiberilgen kez kelgen ádiletsizdik túbi mindetti túrde ashylady jáne bolashaqta eselep kóbeıedi. Bolashaq taǵy da bir jarylystyń sebepkeri bolýy múmkin. Muny qazir otandastarymyzdyń ústinen tergeý júrgizip, olardyń taǵdyry týraly sheshim qabyldaǵandardyń bári túsinýi kerek, - dedi Muhtar Erkinuly.
"Adyrna" ulttyq portaly
