Memleket basşysy Qasym-Jomart Kemelūly Toqaev «Bıraz uaqyttan keiın, mümkın jyl soŋyna qarai, «Nur Otan» partiiasyna odan ärı töraǧalyq etuımnıŋ oryndylyǧy turaly mäselege qaita oralamyz», – dedı
Būl dūrys baǧyttaǧy qadam degen oidamyn. Prezidenttıŋ bır partiianyŋ müşesı boluy qazırgı taŋda özektı emes. Bızge «bilıktıŋ jobalary» dep halyq tarapynan synalmaityn, elektorattaryn ılestıre alatyn partiialar qajet. Öitkenı el azamattarynyŋ senımı qaşanda maŋyzdy. Mysaly, özım bılım alǧan Türkiiada Ädılet jäne Damu partiiasy, Ūltşyldyq qozǧalys partiiasy, Respublikalyq halyq partiiasy jäne t.b. bar. Türık aǧaiyndar būl partiialarǧa jaŋa ideialar men bılıktı kadrlardyŋ generatorlary retınde ümıtpen qaraidy. Eldıŋ qamy üşın jūmys ısteitınderıne senedı. Halyqtyŋ azamattyq belsendılıgı de jaman emes. Al oppozisiialyq baǧyttaǧy Respublikalyq Halyq partiiasynan Ekrem İmamoǧlynyŋ Ystambūl qalasynyŋ äkımı bolyp otyrǧanyn eske salatyn bolsaq, ol jaqtaǧy saiasi partiialar arasyndaǧy şynaiy bäsekelestıktıŋ bar ekenıne köz jetedı.
Jalpy, parlament tiımdı şeşımder qabyldau üşın ärtürlı közqarastardyŋ, jan-jaqty taldaulardyŋ alaŋy bolu kerek. Proporsionaldy sailau jüiesımen ǧana qalmai, qoiylatyn talaptardy aiqyndap, majoritarlyq sailau jüiesın de qalyptastyra bergen dūrys siiaqty. Yqpaldy parlamenttı de köretın kün tuar.
2019 jyly Abai.kz aqparattyq portalynda «Aqyn-jazuşylar men ǧalymdar parlamentte otyru kerek» degen maqalam jariialanǧan edı. Būl jerde mındettı türde tek aqyn-jazuşylar men ǧalymdar bolsyn degen söz emes. Negızgı oi — parlamentke halyqtyŋ äleumettık-ekonomikalyq jaǧdaiyna jete qanyq, qazaqtyŋ tılı men dılın bıletın, elı men jerın süietın azamattardyŋ baruy. Maqalanyŋ tolyq mätını tömendegıdei:
QR Prezidentı Qasym-Jomart Toqaev Ūlttyq qoǧamdyq senım keŋesın qūru turaly bastamany mamyr aiynyŋ basynda özınıŋ sailaualdy baǧdarlamasyn tanystyru barysynda jariialady. Bilık pen halyq arasyndaǧy dialogty damytu maqsatynda qūrylǧan kelelı keŋestıŋ alǧaşqy otyrysy 6 qyrküiek künı Prezidenttıŋ töraǧalyǧymen öttı. Jaŋa organnyŋ otyrysynda būqaranyŋ kökeiınde jürgen mäseleler qozǧalyp, kürmeuı köp tüiınnıŋ şeşılu joldary qarastyryldy. Osy oraida, elımız üşın maŋyzdy kezeŋde enjar qalmai, öz oiymdy aita ketudı jön kördım.
San ǧasyrlar boiy köşpelı qazaq qoǧamynda zaŋ şyǧaruşylyq qyzmettı biler atqarǧanyn jäne şynaiy halyqtyq ülgıdegı dala parlamentı jūmys ıstegenın tarihtan bılemız. Handyqtaǧy biler keŋesı memlekettıŋ saiasi-qūqyqtyq, äskeri-diplomatiialyq, äleumettık-ekonomikalyq jaǧdaiyn tek ädettegı qūqyqpen ǧana emes, eldıŋ ruhani-mädeni salt-dästürımen ūştastyra otyryp qamtamasyz etken. Kültöbenıŋ basynda qabyldanǧan "Täuke hannyŋ Jetı jarǧysynda" aforizm, maqal-mätel, qanatty sözderdıŋ körınıs tabuy sonyŋ dälelı. Biler "Qasym hannyŋ qasqa joly", "Esım hannyŋ eskı joly", "Äz Täukenıŋ Jetı jarǧysy" zaŋdar jinaǧyndaǧy negızgı qaǧidalar men normalardy tolyq meŋgerıp qana qoimai, el-jūrtynyŋ ädet-ǧūrpyn, şejıresın, tarihyn, kemel pıkırlerın şeşen tılmen jetkıze alatyn dara jandar bolǧan. Bolaşaqtyŋ jolyn babalar salǧan joldan ızdep, bügıngı taŋda da ot auyzdy oraq tıldı aqyn-jazuşylar men tıl, ädebiet, tarih salasyndaǧy ǧalymdardyŋ Parlamentke köbırek barǧandary dūrys dep oilaimyn. Qazaqtyŋ tılın, ädebietın, tarihyn jete tüsınetın tūlǧalar bilık pen halyq arasyn jaqyndata tüsedı degen senımdemın.
Tüiıtkıldı mäselelerdıŋ tüiının tarqatuǧa baǧyttalǧan Ūlttyq qoǧamdyq keŋeske halyq ülken ümıt artyp otyrǧany ras. Būǧan deiın de köptegen keŋester men koalisiialar bolǧan. Alaida, "Būl keŋes būrynǧy keŋesten özgerek" dep bılemın. El ırgesı aman, bolaşaǧymyz jarqyn bolsyn!
Quanyş Jūmabekūly
«Euraziia zertteulerı» mamandyǧy boiynşa PhD doktory, «Qazaqstannyŋ 100 jaŋa esımı» jobasynyŋ jeŋımpazy
