Búgin Shymkent qalasynyń ákimi Murat Áıtenov Energetıka jáne ınfraqurylymdy damytý basqarmasynyń esebin tyńdady. Jıynda basqarma basshysy B.Býlatbekov bıylǵy jyly atqarylatyn jumystardy baıandady.
Basqarma basshysy Shymkent qalasynyń 5 jyldyq damý josparyna sáıkes 2022 jyly salada 76 joba júzege asyrylatynyn aıtty. Atap aıtqanda, aýyz sý - 4, káriz júıesi – 14, elektr – 14, tabıǵı gaz – 15, jylý – 5, ınjenerlik ınfraqurylym – 24 nysan bar. Atqarylar jumystardyń nátıjesinde jyl sońynda megapolısti aýyz sýmen qamtý kórsetkishi 98%-dan 99 paıyzǵa, káriz júıesimen qamtý 54 paıyzdan 60 paıyzǵa, sapaly elektrmen qamtý deńgeıi 97%-dan 99%-ǵa, tabıǵı gazben qamtylý kórsetkishin 93%-dan 94,7%-ǵa deıin kóterý josparlanýda. Al, jylý jelileriniń tozý deńgeıi 37-den 35 paıyzǵa tómendeıdi. Jobalardy júzege asyrýda shalǵaı eldimekenderge basymdyq berilgen.
Halyqtyń tirshilik etýine basty qajettilik ınfraqurylym júıeleri ekenin aıtqan qala ákimi sala basshysyna birqatar naqty tapsyrmalar berdi. Aýdandardaǵy tozyǵy jetken elektr jelileriniń barlyǵyn tekserip, kestesin jasaqtap, qadaǵalap otyrý qajet. Ábden tozyǵy jetip, aýmaq jaryqsyz qalǵan sátte emes, aldyn ala baǵamdap, jóndeý jumystaryn jasap otyrý kerektigin, jekemenshik nysandaǵy ınfraqurylym júıeleriniń sapasyna da mán berip, olardy tekseretin mehanızmniń jumys isteýin qamtamasyz etý qajettigin aıtty. Jobanyń mańyzdylyǵy sanynda emes, halyqqa tıimdiliginiń joǵary bolýynda ekenin eskersek, árbiriniń sapaly oryndalýy qatań baqylaýǵa qoıylýyn, turǵyndarmen kezdesýde kóterilgen máseleler jobalardy júzege asyrý barysynda nazarǵa alynýyn tapsyrdy.
Shymkent qalasy ákimdiginiń baspasóz qyzmeti
