10 jasar qyzyn óz ata-anasy satyp jibergen. Baýyr eti balasyn ómir súrsin dep emes, jynystyq quldyqqa bergen, dep habarlaıdy “Adyrna” ulttyq portaly Astana telearnasyna silteme jasap.
Nıgora Ózbekstanda týǵan. Ony nebári on jasynda ata-anasy beıtanys adamdarǵa bir shabadan aqshaǵa sata salypty.
"Perzent kerek joq, aqsha kerek dedi. Ákem nashaqor edi, mamam ishedi. "Áke" dep jylap edim, burylyp qaramady da. Atam meni satady degen sózdi estigennen keıin júregi ustap qaıtys boldy. Jalǵyz janashyrym sol kisi edi. Odan beri týystarym da izdegen emes", - deıdi Nıgora.
Suraýy joq kishkentaı qyzdy satyp alǵandar alǵashynda Saryaǵashqa, odan beri Shymkentke qaraı ákelgen kórinedi. Aıtýynsha, týǵaly ata-anasynan esh jylýlyq kórmegen. Seksýaldyq quldyqta baqandaı toǵyz jyl ómiri ótipti. Ol jerde ózinen basqa jıyrma shaqty qyz boldy deıdi. Olardy qarańǵy úıden attap bastyrmaǵan, uryp-soǵady eken. Júrek jalǵaýǵa tek qara nan men sý bergen.
"Ashtyqtan talaı qyz ólip qaldy sol jerde. Keıbirin shetelge satyp jiberdi. Bizdi bir birimizben aralastyrmaıtyn. Jynystyq qatynasqa túsýden bastartsaq temirmen, shynshyrmen uryp, basyma tapansha taqaıtyn. Qarańǵy qapastaǵy tirshilikten janashyr bir azamat shyǵýǵa kómektesti", - dep qosty Nıgora.
Basqa barar jeri joq bolmaǵandyqtan Nıgora eki aıdan beri daǵdarys ortalyǵyn panalap otyr. Qolynda sábıi bar. Sózinshe, ulynyń ákesi aıaǵy aýyr ekenin bilgen soń tastap ketken. Bir báleden qutyldym degende, ekinshisine tap bolǵan kórinedi.
Jaǵdaıyńdy jasaımyn degenge senip, ekinshi ret te quldyqqa túsip qala jazdaǵanyn aıtady. Bireýler ony malǵa jegipti. Ol jerden eriktilerdiń arqasynda qutylǵan.
"Baıaǵy armany bar-aý deımin. Balalyq kezi seksýaldyq qatynasta, zorlyqta bolǵannan keıin bul kóp nárseni ómirde joǵaltqan. Sol joǵaltqan qasıetterin qaıtadan osy anaǵa bergimiz keledi. Óıtkeni ol armanyn aıta bermeıdi", - deıdi "Kómek" ortalyǵynyń dırektory Malıka Júsipova.
Nıgora jasy otyzǵa taıaǵanda alǵash ret qolyna qalam alyp,árip tanyp jatyr. Onyń ata-anasy, týysqandary izdestirilýde. Biraq ol ózin aqshaǵa satyp jibergen et jaqyndaryn kórgisi kelmeıdi eken. Qazaqstanda ulymmen birge jaqsy ómir súrsem deıdi. Aıta keteıik, bul ortalyqta Nıgora sekildi jynystyq zorlyq-zombylyqtyń qurbany bolǵan taǵy bes qyz bar.
“Adyrna” ulttyq portaly
