Qasym-Jomart Toqaevqa Ómirzaq Shókeev 2021 jyly Túrkistan oblysynda atqarylǵan jumystar týraly esep berdi.
Ómirzaq Shókeevtiń aıtýynsha, ekonomıkanyń negizgi kórsetkishi – jalpy óńirlik ónim kóleminiń ósimi byltyr 2020 jylmen salystyrǵanda 4,7 paıyzǵa artqan. Aýyl sharýashylyǵy salasynda 906,5 mıllıard teńgeniń ónimi óndirilip, ósim 101,7 paıyzdy quraǵan. Bul nátıje oblystyń respýblıkadaǵy úlesi boıynsha ekinshi orynǵa shyqqanyn kórsetedi.
Aımaq ákimi «Qarapaıym zattar ekonomıkasy» baǵdarlamasy aıasynda 315 joba qarjylandyrylǵanyn aıtty. Prezıdentke óńirdegi qurylys qarqynyń artqany týraly málimet berildi. Qurylys jumystarynyń kólemi 2020 jylmen salystyrǵanda 4,1 paıyzǵa artqan. Ómirzaq Shókeev Túrkistan qalasyn túrki áleminiń mádenı-rýhanı ortalyǵy retinde qalyptastyrý jumystarynyń birinshi kezeńi aıaqtalyp, áleýmettik ınfraqurylymnyń negizi qalanǵanyn jetkizdi.
Onyń aıtýynsha, oblystyń 2021-2025 jyldarǵa arnalǵan jańa keshendi jospary bekitilgen. Oblys ákimi «Halyq únine qulaq asatyn memleket» tujyrymdamasyna sáıkes, Saıram aýdanynda júzege asyrylǵan «Parasatty dıskýssııalyq klýb» pılottyq joba týraly baıandady. Atalǵan joba oblys, aýdan, aımaqtaǵy kúshtik qurylym basshylarynyń turǵyndarmen kezdesýlerin, ashyq áńgimelesýlerin qamtamasyz etedi.
Qasym-Jomart Toqaev Túrkistan oblysynda atqarylyp jatqan jumystarǵa oń baǵa bere otyryp, qolǵa alynǵan jobalardy jalǵastyrýdy jáne halyqpen tyǵyz jumys isteýdi kúsheıtýdi tapsyrdy.
"Adyrna" ulttyq portaly
