Qazaqstanda sot şeşımımen üş universitet jabyldy - BǦM

4366
Adyrna.kz Telegram
https://adyrna.kz/content/uploads/2022/02/dlqgtuex4aezjaf.jpg
Qazaqstandyq üş autsaider joǧary oqu orny sot şeşımımen jabyldy, dep habarlaidy QR Bılım jäne ǧylym ministrlıgınıŋ baspasöz qyzmetı. Būl turaly "Adyrna" ūlttyq portaly jazady.
Olar:
1. Ortalyq Aziia universitetı
2. Aqtau gumanitarlyq-tehnikalyq universitetı 
3. «Astana» universitetı.
Soŋǧy jyldary aty atalǧan joǧary oqu oryndary BǦM tapsyrysy boiynşa «Atameken» ŪKP jürgızetın bılım beru baǧdarlamalarynyŋ reitingınde ünemı tömen pozisiiadan körındı. Būl universitetterdegı bılım beru baǧdarlamalarynyŋ basym bölıgı jūmys beruşılerdıŋ talabyna sai kelgen joq jäne bılım aluşylar arasynda da sūranysqa ie bolmady.
«Mysaly, Ortalyq Aziia universitetı reitingke 2019 jyly – 36, 2020 jyly – 37, 2021 jyly – 11 bılım beru baǧdarlamasy boiynşa qatysty. Iаǧni köptegen baǧdarlamalar boiynşa tülekterdıŋ azdyǧyna bailanysty nätije körsete almady. Jabylǧan joǧary oqu oryndary sapany jaqsartu baǧytynda jūmys ıstemegen joq, bılım beru baǧdarlamalaryna investisiia salmady, praktik-mamandardy qyzmetke tartpady. Taldau nätijesıne süiensek, bılım beru baǧdarlamalary boiynşa reitingı tömen joǧary oqu oryndary qauıptı aimaqqa tüsetın universitettermen özara bailanysty bolady. Nätijesınde autsaider joǧary oqu oryndary lisenziiasynan aiyrylyp, bılım beru qyzmetın toqtatty», – dep atap öttı QR BǦM Bılım jäne ǧylym salasyndaǧy sapany qamtamasyz etu komitetınıŋ töraǧasy Gülzat Köbenova.
Däl osyndai jaǧdai «Astana» universitetı men Aqtau gumanitarlyq-tehnikalyq universitetınde oryn aldy. Būl joǧary oqu oryndarynyŋ bılım beru baǧdarlamalarynyŋ 70-75%-y sapasy boiynşa talaptarǧa jäne jūmys beruşılerdıŋ sūranysyna sai bolmady.
«Sonymen qatar qazır basqa joǧary oqu oryndaryn tekseru nätijelerı boiynşa sot prosesterı jürıp jatyr. Akademik Ä.Quatbekov atyndaǧy Halyqtar dostyǧy universitetınde pedagogikalyq jäne tehnikalyq baǧyt boiynşa kadr daiarlau jūmys beruşılerdıŋ talabyna sai kelmeidı. Kadr daiarlau sapasyn jaqsartu - maŋyzdy mäsele. Eger bügın universitetter tiıstı talapqa sai bolmasa, onda erteŋ bız bılımı men bılıktılıgı jūmys beruşılerdıŋ sūranysyn qanaǧattandyrmaityn mamandardy daiarlaimyz. Bız joǧary oqu oryndaryna olqylyqtardyŋ ornyn toltyruǧa uaqyt beremız, alaida olar tüzetuge asyqpaidy. Osyǧan bailanysty bız qataŋ şara qoldanamyz. Joǧary oqu oryndary oqytu jaǧdaiyn, bılım beru baǧdarlamalaryn, sonymen qatar studentterdıŋ türlı mamandyqty meŋgeru daǧdylaryn jaqsartuǧa jaǧdai jasauy tiıs. Olai bolmasa, joǧary oqu oryndary diplomdardy sapaly bılım bermei-aq ülestıretın bolady», – dep tolyqtyrdy Gülzat Köbenova.
Soŋǧy 3 jylda jūmys beruşılerdıŋ JOO-lardaǧy bılım beru baǧdarlamalarynyŋ sapasyn baǧalauyn taldau nätijesı jūmys beruşıler arasynda maman daiarlau sapasyna qanaǧattanu körsetkışınıŋ öskenın körsettı. Universitetterdıŋ bılım beru baǧdarlamalarynyŋ 85%-y jūmys beruşılermen kelısılgen. Qabyldanǧan tüzetulerge säikes, oqu jylynyŋ basynan bastap praktik-mamandar tartylady. BǦM talapkerlerge, studentterge jäne olardyŋ ata-analaryna universitet taŋdaǧan kezde sapaǧa nazar audaru qajettıgın eske saldy. JOO reitingınıŋ nätijelerın QR BǦM jäne «Atameken» QR ŪKP resmi saittarynan bıluge bolady.

"Adyrna" ūlttyq portaly

Pıkırler