Amerıkalyq CBS telearnasy amerıkalyq sheneýnikke silteme jasap, Reseı áskerı qolbasshylyǵy Ýkraınaǵa shabýyldy bastaý týraly buıryq alǵanyn málimdedi, dep habarlaıdy "Adyrna" ulttyq portaly Tengrinews.kz-ke silteme jasap.
"Bizde reseılik qolbasshylarǵa Ýkraınaǵa basyp kirýge buıryq berilgeni týraly barlaý málimeti bar", - dedi telearna tilshisi Devıd Martın efırde.
Onyń aıtýynsha, komandırlerge urys dalasyndaǵy óz sektorynda naqty áreket etý josparyn ázirleý tapsyrylǵan.
Sonymen qatar, telearna málimetinshe, bul buıryq shabýyl bolatyny sózsiz ekenin bildirmeıdi, óıtkeni Reseı prezıdenti Vladımır Pýtın áli de buıryqty ózgerte alady.
Bul rette Reseı qorǵanys mınıstrligine jaqyn derekkóz RIA Novostı agenttigine bergen suhbatynda, CBS telearnasynyń aqparatyn aqymaqtyq dep atady.
"Osy "sensaııa" avtorlary óz qııalymen prezıdent Djo Baıdendi keleńsiz jaǵdaıǵa túsirdi. Baıden ótken aptanyń basynda Reseı áskerleri 16 aqpanda, sársenbide Ýkraınaǵa basyp kirýi kerek, barlaý dál rastady dep málimdedi. Endi "amerıkalyq barlaý" 16 aqpannan keıin bir apta ótken soń Reseı komandırleri "óz is-áreketin josparlaýmen" aınalysqanyn anyqtady", - dedi aqparat kózi.
"Múmkin Pentagonda jedel josparlaý osylaı uıymdastyrylǵan shyǵar. Aldymen komandırler áskerin urysqa jiberedi. Birneshe kúnnen keıin "óz áreketterin josparlaýǵa kirisedi". Amerıkalyq áskerdiń Aýǵanstannan asyǵys ketý mysaly, solaı dep oılaýǵa tolyq negiz beredi", - dep tolyqtyrdy agenttik derekkózi.
Onyń aıtýynsha, Reseı qarýly kúshterinde bári múlde basqasha uıymdastyrylǵan. "Sondyqtan, amerıkalyq BAQ-tyń bul aqymaqtyǵy ay mysqyldan basqa eshteńe týǵyzbaıdy", - dep túıindedi derekkóz.
"Adyrna" ulttyq portaly
