Shymkentte ótken jyly shalǵaı ornalasqan 14 eldi mekenge bazalyq stanııa ornatylyp, mobıldi ınternet jelisimen qamtý kórsetkishi 91% jetti.
Bul týraly ıfrlandyrý basqarmasynyń basshysy Áset Ábdirahanov @akimat_shymkent ınstagram paraqshasynda ótken tikeleı efır barysynda baıandady.
Basqarma basshysynyń sózinshe, 2022 jyly ınternet sapasy tómen 11 eldi mekenge bazalyq stanııa ornatylady. Olar: Aqnıet, Qyzyljar, Martobe, Dostyq, Jańatalap, Eltaı jáne Toǵys, Táýelsizdikke 20 jyl, Azat, Turan, Asar jáne Qursaı shaǵyn aýdandary. Nátıjesinde, 71 200 qala turǵyny sapaly ınternetke qol jetkizip, qamtý úlesi 95% jetedi.
–2021 jyly jeke ınvestor esebinen 10 eldi mekenge talshyqy optıka jelisi júrgizilip, 100 myńǵa jýyq qala turǵyny sapaly ınternetke qosylýǵa múmkindik jasaldy. Al, 2022 jylǵy jospar boıynsha, 15 qaladan eldi meken (Samal-3, Aqnıet, Qyzyljar, Yntymaq, Jaılaý, Qarasý, Soltústik-Batys, Qarabastaý, Zabadam, Mıras, Mártóbe, Asar-2, Qaınarbulaq, Qursaı, Qazyǵurt) talshyqty optıka jelisimen qamtylady, - dedi Á.Ábdirahanov.
Ótken jyly Ubiquiti Networks tehnologııasy arqyly qaladaǵy 30 qoǵamdyq orynǵa tegin WI-FI iske qosylǵan. Bıyl qoǵamdyq oryndardy ınternetpen tolyq qamtý úshin 9 jerge 25 qurylǵy ornatylady.
Efır barysynda turǵyndardan 70-ten astam suraq kelip tústi. Basqarma basyshysy ár bir turǵynnyń suraǵyna jeke jaýap berdi.
