2022 jyly 15 aqpan kúni Reseı Memlekettik Dýma depýtattary Donbass pen Lýganski aımaqtaryn táýelsiz respýblıka dep jarııalaý týraly qaýlyny bir aýyzdan maquldaǵan edi. Naqtyraq aıtsaq, 351 depýtat qoldap daýys berdi, dep habarlaıdy “Adyrna” ulttyq portaly Bugin.kz saıtyna silteme jasap.
Basynda mundaı avantıýrısttik qujatty qoldap daýys bergen Reseı depýtattarynyń keıbiri bul isine ókine bastady. Solardyń biri KPRF partııasynyń depýtaty – Mıhaıl Matveev. Alǵashqylardyń biri bolyp úkimetten Ýkraınany bombalaýyn toqtatýdy talap etti.
Depýtatpen BBC tilshisi suhbattasyp, nege mundaı qadamǵa barǵanyn surap kórdi. Suhbatynan úzindi usynamyz.
"Memlekettik Dýmaǵa kelgen qujatta DHR men LHR-di táýelsiz el dep jarııalaý jaıly, sol arqyly Donbasta bolyp jatqan segiz jyldyq soǵysty doǵarý maqsaty ǵana kórsetilgen-tuǵyn. Beıbit ásker kirgizý jaıly ǵana sóz boldy. Abhazııa men Ońtústik Osetııany táýelsiz el dep moıyndaǵanymyz syndy senarıı bolady dep oıladyq. Búkil depýtat solaı oılady, oıynda sol ǵana boldy. Múmkin aramyzdan keı depýtat pen senatorlar alda ne bolaryn ishteı bilgen de, sezgen de bolar. Biraq olardyń kim ekenin men bilmeımin. Habarym joq. Dál qaı tustan kemshilik ketti – ony da bilmeımin. Biz qabyldaǵan qaýlynyń mundaı alyp soǵysqa ákeletinin kim bilgen? Beıbit ásker Donbasqa kirip, táýelsiz respýblıkalyq qaýipsizdigin qamtamasyz etýi tıis edi. Biraq qujatqa daýys berýdiń sońy Kıevti bombalaýǵa, búkil áskerı kúshtiń Ýkraınaǵa enerin kim bilgen? Erteńinde Reseıdiń Ýkraınaǵa basyp kirgenin kórip estip, shalqamnan túse jazdadym. Depýttardyń eshkimi de muny kútpedi, shyny kerek. Memlekettik Dýmadan shyqqan qujat pen Federaııa keńesinde talqylanǵan máseleniń arasynda alshaqtyq bar", - deıdi Matveev.
Onyń oıynsha, áskerı basqynshylyq jasamaı Reseı basshylyǵy Ýkraına bıligimen beıbit kelisimge kelýi kerek edi.
"Soǵysty bastaǵan bılik partııasy Ýkraına bıligimen kelisim jasap kórýge tyryspaǵan da syńaıly. Oıy Donbasty qorǵaý emes. Reseı myna mashtabty áskerı basqynshylyǵyn toqtatýy tıis. Soǵystyń sońy qalaı ýshyǵyp ketkenin dál aıtý qıyn. Biraq Ýkraınada bolyp jatqan jaǵdaı – bul naǵyz katastrofa. Reseı de, Ýkraına da, búkil álem bul konflıktini sheshýge atsalysýy kerek. Ýkraına bıliginiń ultshyl ekenin bárimiz bilemiz. Biraq Reseı eshqashan ózi soǵys bastamaǵan el ǵoı. Tarıhta abyroıdy ustap turǵan da osy qasıet edi. Endi budan aıyrylǵaly turmyz. Reseı bıliginiń qateligi de sol – máseleni beıbit jolmen sheshýdiń búkil dúnıejúzilik tásilin, joldaryn qoldanyp kórmeı, birden shabýylǵa shyǵýy. Ýkraına da saý sıyrdyń boǵy deı almaımyn. Biraq Reseı aǵalyq, araǵaıyndyq jasaýy, izet kórsetý kerek edi", - deıdi depýtat.
“Adyrna” ulttyq portaly
