Reseilık käsıpker Aleks Konanihin Resei prezidentı Vladimir Putindı bilıkke «Reseidegı köpqabatty üilerdı jaru arqyly» kelgenın aitty, dep habarlaidy “Adyrna” ūlttyq portaly Orda.kz saityna sılteme jasap.
Resei prezidentı Vladimir Putindı tūtqyndaǧany üşın 1 million AQŞ dollar syiaqyny reseilık äskeri käsıpker Aleks Konanihin Reseidıŋ Ukrainaǧa basyp kıruın jalǧastyruda osy aptada äleumettık jelıde jariialady.
«Men konstitusiialyq mındetın oryndai otyryp, Resei jäne halyqaralyq qūqyqqa säikes Putindı äskeri qylmysker retınde tūtqyndaǧan ofiserge(lerge) 1 000 000 dollar töleuge uäde beremın.Putin Resei prezidentı emes, öitkenı ol Reseidegı tūrǧyn üilerdı jaru arqyly arnaiy operasiianyŋ nätijesınde bilıkke keldı. Sodan keiın erkın sailaudan bas tartyp, qarsylastaryn öltıru arqyly Konstitusiiany būzdy» delılgen Konanihinnıŋ Facebook paraqşasyndaǧy habarlamada.
«Men etnikalyq orys jäne Resei azamaty retınde Reseidı denaziialandyruǧa üles qosudy moraldyq boryşym dep sanaimyn. Men Ukrainaǧa Putin Ordasynyŋ şabuylyna tötep berudegı qaharmandyq küş-jıgerımdı körsetudı jalǧastyramyn» dep tüiındedı käsıpker.Habarlamada Putinnıŋ fotosuretı bar suret jäne «Izdeude: ölı nemese tırı. Vladimir Putin. Jappai adam öltırgenı üşın». Eske salsaq, Resei prezidentı Vladimir Putin Donbas respublikalary basşylarynyŋ ündeuıne jauap retınde arnaiy äskeri operasiia jürgızu turaly şeşım qabyldap, Ukrainaǧa qarsy soǧys jariialady. Alaida Resei basşysy Mäskeudıŋ josparynda Ukraina aumaqtaryn basyp alu joq ekenın aitqan bolatyn. 2 nauryz künı taŋerteŋgı jaǧdai boiynşa Resei äskerı 5840 adamnan aiyryldy. Sondai-aq 60-tan astam ūşaq pen tıkūşaq, 862 bronetransporter, 85 artilleriialyq jüie jäne basqa da köptegen tehnika joiyldy. 28 aqpandaǧy jaǧdai boiynşa 352 beibıt tūrǧyn, onyŋ ışınde 16 bala qaza tauyp, 2040 adam jaraqat aldy. Ukraina prezidentı Vladimir Zelenskii Resei äskerınıŋ şabuyldyŋ alǧaşqy saǧattarynan bastap azamattyq infraqūrylymǧa soqqy berıp jatqanyn aitty. Prezidenttıŋ aituynşa, Resei basqynşy äskerlerınıŋ Ukrainadaǧy äreketterınde genosid belgılerı bar. 27 aqpanda Ukraina «basqynşylyqty aqtau üşın genosid ūǧymyn būrmalaǧany üşın Reseidı jauapqa tartudy» talap etıp, Halyqaralyq sotqa Reseige qarsy şaǧym tüsırdı. Reseidıŋ Ukrainaǧa basyp kıruıne qatysty tergeudı Halyqaralyq qylmystyq sottyŋ prokurory Kärım Hannyŋ özı bastady.
“Adyrna” ūlttyq portaly
