Reseılikter dúken sórelerinde taýar tapshylyǵynyń oryn alýynan qorqyp, jeke zattaryn qant pen qaraqumyqqa almastyra bastady. Bul aqparatty Medialeaks jarııalady, dep jazady "Adyrna" ulttyq portaly.
Jarııalanǵan aqparatqa sáıkes, jeli qoldanýshylary Avito platformasynda habarlandyrýlardy jappaı jarııalaı bastady, onda olar satyp alýshylarmen kıim, aıaq kıim, turmystyq tehnıka, tipti jıhazdy ártúrli azyq-túlik ónimderine aıyrbastaýǵa kelisim jasaýǵa tyrysýda. Qazirgi ýaqytta sýpermarketterde belgili bir taýarlardy bir qolǵa satyp alýda shekteý engizilgeni belgili.
Máselen, Sochı turǵyny kez-kelgen adamǵa bes keli qant úshin Sonata Collection brendiniń júnnen tigilgen paltosyn jiberýge daıyn. Bul rette máskeýlik Olga Avito qoldanýshylaryna eki keli qaraqumyq úshin Respect brendiniń bylǵary aıaq kıimin aıyrbastaýdy usyndy. Onyń aıtýynsha, ol bul aıaq kıimdi alty myń rýblge satyp alǵan.
Joǵaryda atalǵan usynystardan basqa, reseılikter ózderiniń jıhazdaryn, ártúrli dekor buıymdaryn, Samsung sııaqty sheteldik óndirýshilerdiń turmystyq tehnıkasyn, sonymen qatar ydys-aıaq pen saǵattaryn azyq-túlikke aıyrbastaýǵa tyrysýda.
"Adyrna" ulttyq portaly
