Qazaqstannyŋ Sifrlyq damu, innovasiialar jäne aeroǧaryş önerkäsıbı ministrlıgı vlast.kz-tıŋ saualyna jauap bere otyryp, Reseilık SBER-men Qazaqstannyŋ sifrlyq transformasiiasy turaly kelısımge qol qoiu mäselesı būdan bylai sifrlyq damu ministrlıgınıŋ kün tärtıbınde joq ekenın habarlady, dep jazady "Adyrna" ūlttyq portaly.
"Bügıngı künı kelısımge qol qoiu mäselesı kün tärtıbınde tūrǧan joq. Älemdegı qazırgı jaǧdaiǧa bailanysty ministrlık bırneşe ssenariilerdı äzırleudı qarastyryp jatyr jäne olardyŋ ärqaisysyna daiyndaluda» - delıngen ministrlıktıŋ jauabynda.Būl rette ol qandai ssenariilerdı qarastyratynyn jäne sifrlyq transformasiiada Qazaqstannyŋ serıktesı kım bola alatynyn naqtylamady. Esterıŋızge sala keteiık, ötken jyldyŋ 3 qyrküiegınde Qazaqstan ükımetı ekı el prezidentterınıŋ qatysuymen reseilık SBER tobymen sifrlyq ükımet platformasyn qūru boiynşa jūmys turaly memorandumǧa qol qoiǧan bolatyn. Köptegen qazaqstandyq mamandar men qoldanuşylar daiyndyǧy habarlanbaǧan memorandumǧa qol qoiǧannan keiın ony synǧa alyp, qazaqstandyqtar derekterınıŋ qauıpsızdıgıne kümän keltırıp, sifrlyq platforma qūru boiynşa serıktestı taŋdaǧanyna taŋǧaldy. Köp ūzamai sifrlyq damu, innovasiialar jäne aeroǧaryş önerkäsıbı ministrı Baǧdat Musin serıktes retınde SBER-dı taŋdauyn kompaniianyŋ bastapqy kodtardy beruge kelıskendıgımen tüsındırdı. Sondai-aq, derekter bazalary Qazaqstan aumaǧynda ornalasatynyn jäne reseilık mamandardyŋ olarǧa qol jetkıze almaitynyn mälımdedı. Platformany qūru boiynşa jūmys bırneşe jylǧa sozylady. Jūmysty bastau turaly kelısımge 2022 jyldyŋ basynda qol qoiylady dep boljanǧan. Aqpan aiynda Reseidıŋ Ukrainaǧa basyp kıruınen keiın Sberbankke sanksiialar engızılıp, bank Europadaǧy jūmysyn toqtatqan. Bıraq bırneşe elde, sonyŋ ışınde Qazaqstanda jūmysyn jalǧastyruda.
"Adyrna" ūlttyq portaly
