Qoǧam qairatkerı ärı käsıpker Arman Şoraev belgılı media menedjer Armanjan Baitasovtyŋ Baitassov LIVE Youtube arnasyna bergen sūhbatynda qazaqtardy "ūltşyldar" dep kınälaityndarǧa jauap berdı. Būl turaly "Adyrna" ūlttyq portaly jazady.
"Olar bızde ūltşyldar bar deidı. Keşırıŋız, Resei azamattyǧyn alu üşın sız orys tılınen emtihan tapsyruyŋyz kerek. Qazaqstanda mūndai joq qoi. Älı künge deiın būl talap qoiylmady. Sonymen bızdıŋ qaisymyz köbırek ūltşyl ekenbız? Latviiada da Latviia azamatynyŋ jäne azamattyǧy joq adamnyŋ tölqūjaty bar. Iаǧni, Latviia azamaty atanu üşın latyş tılınen emtihan tapsyru qajet. Eger Latviianyŋ tarihyn bılmeseŋ, Latviia azamatynyŋ tölqūjatyn ala almaisyŋ. Bızde ondai joq. Sondyqtan, menıŋ oiymşa, būl aiyptaulardyŋ bärı negızsız", - dedı Arman Şoraev.Onyŋ aituynşa, elımızdegı barlyq etnos ökılderın tek qazaq tılı bırıktıredı.
"Bızdı tek öte ädemı, körkem ärı bai tıl - qazaq tılı ǧana bırıktıre alady. Menıŋ ışımde bır emes ekı adam bar. Men qazaq tılın jetık bılemın, tarihymdy tanimyn jäne onymen maqtanamyn. Elımızde tūratyn kez kelgen adam, kez kelgen ūlt ökılı ony üirene alady dep oilaimyn. Eger ol qazaq tılın jetık meŋgerse, qazaq būl kısını eŋ qūrmettı oryndarǧa otyrǧyzatyn bolady. Oǧan eŋ dämdı degen taǧamdardy ūsynyp, syi körsetedı. Sondyqtan, men būl jerde artyqşylyqtardan basqa, eşqandai kemşılık körıp tūrǧanym joq", - dep mälımdedı qoǧam qairatkerı.
"Adyrna" ūlttyq portaly
