Mamandyq tańdaý-adam ómirindegi jaýapty qadam. Qoǵamda kezdesetin áleýmettik máselelerdiń týyndaýy da pende ataýlynyń azyq tabar isin durys tappaýynyń, saıyp kelgende baǵdarynan jańylǵanynyń nátejıesi.
Ásirese úlken ómirge endi qanat qaqqaly otyrǵan jas býynnyń aldyndaǵy tańdaýdan qatelespeýi mańyzdy-aq. Áne-mine mektepti aıaqtaǵaly otyrǵan bozbala men boıjetken keleshegin nemen? qalaı baılanystyrmaq? Bul bir ǵana tulǵanyń emes tutas qoǵamdy tolǵandyrýy tıis.
Osyǵan oraı, Almaty oblysy ishki saıasat jáne bilim basqarmalary birlese otyryp, «Ómirlik baǵdar» jobasyn iske asyrýdy qolǵa aldy.
Negizgi maqsat - mektep oqýshylaryna arnalǵan kásiptik baǵyt berý.
Respýblıka boıynsha tuńǵysh ret júzege asqaly otyrǵan jobanyń burynǵydan jóni bólek. Munda belgili bir oqý oryndarynyń ókilderi túlektermen tildesip qana qoımaıdy.
Ózgeshe túrlengen jobada Almaty oblysyndaǵy 800 aýyldaǵy mektepterdiń 9-11 synyp oqýshylary túgelimen qamtylmaq. Ár balanyń qarym-qabileti jeke-jeke saralanyp, soǵan sáıkes, oqýshyǵa mamandyqqa qatysty baǵyt-baǵdar berilmek.
Kásiptik baǵdar berý jumystarynda túlektermen birge olardyń ata-analary da qamtylady. Joba jetekshileriniń paıymynsha, balanyń sheshim qabyldaýyna ata- ananyń pikiri áser etedi. Sol sebepti ata-anaǵa da balasynyń bolashaq mamandyǵyn tańdaýynda nege asa mán berý kerektigi, bolashaqta qandaı kásipter suranysqa ıe bolatyndyǵy jaıly aqparat beriledi.
Jastardyń bilim berý granttary, kásiptik oqý, tıimdi mamandyqqa qatysty júıeli oıynyń qalyptaspaǵanyn tilge tıek etken Almaty oblysy ishki saıasat basqarmasynyń bashysy Bolat Kerimbek jańa joba kóp kúttirmeı óz jumysyn bastaıtyndyǵyn aıtty.
«Joba sáýir aıynyń 13-22 aralyǵynda júzege asady. Biz arnaıy jumys tobyn qurdyq. Olar aldaǵy tańda oblystyń ár aımaǵyna baryp, túsindirý jumystaryn ótkizedi. Jobaǵa qatysty aqparattar BAQ betterinde jarııalanady, telearnada júgirtpe jolda aqparattyq mátindi ornalastyrý kózdelgen. Sondaı-aq arnaıy Call ortalyq iske qosylatyn bolady»,-dep aıtty Bolat Baqbergenuly.
«Ómirlik baǵdar» jobasynyń jumys josparyna sáıkes, aldaǵy tańda daryndy oqýshylardy qoldaý maqsatynda qor qurylmaq. Sonymen qatar balalardy qorshaǵan ortany qorǵaýǵa baýlý úshin mektep janynan «Botanıkalyq baq» ashý kózdelinip otyr. Jáne de mektep oqýshylary arasynda pikir-saıys qoǵalysyn damytý qolǵa alynbaq.
Aıta keteıik, jospar boıynsha «Telefonsyz mektep jáne kolledj» degen pılottyq joba júzege asatyn bolady. Alǵash bolyp, bul bastama Taldyqorǵan qalasyndaǵy №9 mektepte iske asady.
“Adyrna” ulttyq portaly
