Orystar Ädılet ministrınen ūlty men familiiasyn özgertuge bola ma degen saual joldady, dep habarlaidy “Adyrna” ūlttyq portaly.
Viktor Kalgin esımdı Azamat öz ötınışınde bylai jazǧan:
«Resei armiiasy Ukrainaǧa basyp kırgenın eldıŋ bärı bılıp, körıp otyr. Osynyŋ kesırınen düniejüzınde orystarǧa degen terıs közqaras qalyptasyp jatyr. Qazır bükıl älem qai elde tūryp jatqanymyzǧa, Reseidıŋ äskeri operasiiasyna közqarasymyzǧa qaramastan, orys ekenıŋdı bılse terıs ainalady. Köp adam orys bolǧany üşın ūialatyn jaǧdaiǧa jettı. Keibırımız ömırımız men densaulyǧymyz üşın qorqa bastadyq. Eger orys adamdy türıne qarap, europalyq näsıldıŋ basqa ökılderınen aiyru qiyn bolsa, onda onyŋ familiiasyna qarap, tez aiyruǧa bolady. Sebebı orystardyŋ köbısınıŋ ata-tegı -ev, -ov, -in jalǧaularymen aiaqtalady. Bolaşaqta men Europaǧa turistık sapar jasaudy josparlaǧanmyn. Endı menı orys bolǧanym üşın qonaqüi, dämhana, düken men basqa da oryndarda jekköre me dep qorqamyn. Qazır Europada tūratyn orystarda sondai jaǧdai bolyp jatyr eken» dep jazǧan Viktor Kalgin. «Men familiiam men ūltymdy auystyrǧym kelıp otyr. Bıraq qalai auystyrudy bılmei otyrmyn. Familiiamen men ūltymdy auystyruǧa mümkındık bar ma?» – dep sūrady ötınış iesı.Qanat Musin:
«Qazaqstan Respublikasyndaǧy jergılıktı memlekettık basqaru jäne özın-özı basqaru turaly zaŋynyŋ «Audandyq (oblystyq maŋyzy bar qalalyq) äkımdıktıŋ qūzyretı» atalatyn 31-babynyŋ 1-bölımınıŋ 2-2 tarmaqşasyna säikes, jergılıktı audandyq nemese qalalyq äkımdık Qazaqstan zaŋnamasynda belgılengen tärtıppen azamattyq hal aktılerın tırkeudı jüzege asyrady jäne tırkeu turaly mälımetterdı Jeke tūlǧalar turaly memlekettık derekqorǧa engızedı. Osyǧan bailanysty mäseleŋızdı şeşu üşın öz öŋırıŋızdıŋ äkımdıgıne jügınuge keŋes beremız», – dedı ol.
”Adyrna” ūlttyq portaly
