Túrkimenstanda áıelderge botoks, kirpik uzartý, tyrnaq jáne tatýırovka saldyrtqany úshin aıyppul salynýy múmkin, dep habarlaıdy "Adyrna" ulttyq portaly.
Sulýlyq salondarynyń tutynýshylary zańdy buzǵany úshin 300-500 manat (38 000 - 64 000 teńge) kóleminde aıyppul tóleıdi. Al sheberler kórsetken qyzmeti úshin tipti 15 táýlikke qamaýǵa alynady.
Salon qyzmetkerleri mundaı tyıymdar salynǵan jaǵdaıda qalypty jumys istep, nápaqa taba almaımyz dep shaǵymdanýda.
«Serdar Berdimuhamedv prezıdenttikke kirisýimen karantındik shekteýlerdi alyp tastaı bastaǵannan keıin biz jumysqa endi ǵana oraldyq. Biraq jumysymyz taǵy da shekteldi. Al endi nege biz de bazarǵa baryp qaıyr suraýymyz kerek? Osylaısha biz karantın kezinde qaryzǵa battyq, olardy óteýge áli úlgermedik. Endi jumys isteımiz be degende, mynadaı shekteýler qoıylyp jatyr», - deıdi sulýlyq salonynyń qyzmetkerleri.
Túrkimenstan bıligi tyıym salǵan kosmetıkalyq qyzmetter álemniń kóptegen elderinde qalypty rásim bolyp sanalady jáne áıelder ony esh kedergisiz qabyldaıdy.
Biraq Túrkimenstanda kóptegen jyldar boıy áıelderge sulýlyq salondarynyń keıbir qyzmetterin paıdalanýǵa tyıym salynǵan. Bul tyıymdar ádette úkimettegi joǵary laýazymdy adam, atap aıtqanda Ishki ister mınıstri aýysqanda kúsheıtiledi.
"Adyrna" ulttyq portaly
