Búgin Aqparattyq-kommýnıkaııalyq ortalyǵynda Shymkent qalasynyń dene shynyqtyrý jáne sport basqarmasynyń basshysy Baýyrjan Tumanbaev osylaı dep málimdedi. Basqarma basshysy 2021 jyly atqarǵan jumystaryn qortyndylap aldaǵy josparlary týraly sóz qozǵady.
Baýyrjan Tumanbaevtyń aıtýynsha, qalada sportpen júıeli túrde shuǵyldanatyn azamattar sany 353 752 adamdy quraıdy.
- Bıylǵy jyldyń mańyzdy is sharasynyń biri qyrkúıek aıynda Qytaı elinde ótetin HIH jazǵy Azııa oıyndary. Ulttyq qurama sapynda sporttyń 23 túrinen 58 úmitker sportshymyz qatysady dep josparlanýda. Olar qazirgi tańda QR ulttyq qurama sapynda tyńǵylyqty daıyndyq jumystaryn júrgizýde -dedi spıker.
2021 jyly Shymkent qalasynyń sportshylary jas erekshelikterine sáıkes ulttyq qurama sapynda MMA-dan Álem chempıonatyna boks, taekvondo, baıdarka jáne gandboldan Azııa chempıonattaryna jáne qalamyzdyń qurama komandasynyń sportshylary 42 sport túrinen Qazaqstan Respýblıkasynyń chempıonattaryna qatysty.
Nátıjesinde:
- Álem chempıonatynda jalpy 1 altyn, 1 kúmis, 1 qola medal;
- Azııa chempıonattarynda 16 altyn, 8 kúmis, 16 qola medal;
- Qazaqstan Respýblıkasynyń chempıonattarynda 208 altyn, 175 kúmis, 212 qola medalǵa qol jetkizgen.
Buqaralyq sporttyń jaǵdaıy men damýy qajetti sporttyq ınfraqurylymnyń bolýyna baılanysty ekenin de tilge tıek etken spıker, qazirgi ýaqytta qala boıynsha sporttyq nysandar sany 933-ke jetkenin, 2021 jyly qala aýmaǵyndaǵy turǵyn alaptar men shaǵyn aýdandarda sporttyq ınfraqurylymdy damytý maqsatynda 115 sport alańshanyń qurylysy júrgizilgenin aıtyp ótti.
