Atyraýda kópbalaly analarǵa sheneýnikter ashyp ketken sút, ishýge jaramaıtyn shaı bergen, dep habarlaıdy “Adyrna” ulttyq portaly turkystan.kz saıtyna silteme jasap.
Analardyń aıtýynsha, sheneýnikter turmysy tómen otbasylarǵa kómek retinde azyq-túlik taratqan. Al álgi tamaq ónimderiniń arasynan merzimi ótip ketken sút pen óte arzan shaı shyqqan. Sheneýnikterdiń bul isine ashýlanǵan kópbalaly analar shaıdy ishpeı, qala ákimi Meıirim Qalaýıge syılaýdy jón sanapty.
«Analarǵa kómek» qoǵamdyq qorynyń tóraıymy Sandýǵash Kókenova oblystyq ákimdiktiń atynan kelgen shaıdy kórsetip, ýájin jetkizdi. Onyń aıtýynsha, ákimdik taratqan shaıdy túrmedegilerdiń ózi ishpeıtin kórinedi.
«Úıińizge aparyp, qaınatyp kórińiz. Osyndaı sháıdi isher me edińiz? Bul sháıdi túrmede otyrǵandar da almaıdy», – deıdi ol.
«Mynaý mazaq qylǵany ǵoı. Sút ashyp ketken. Ne masqara?! Uıat qoı. Bir nan berse de adal nan qyp bersinshi. Qatyp qalǵan, kógergen nan bermesin!» – deıdi ashynǵan analar.
Al ákim bolsa, kómekke muqtaj otbasylarǵa berilgen taýarlarǵa qatysty máseleni anyqtap, shara qoldanatynyn aıtty.
“Adyrna” ulttyq portaly
