Sońǵy kúnderi jekede “osy jaıly ne aıtasyń, dostaryń emes pe” tárizdi habarlamalar tolyp ketti. Endeshe óz pikirim osy. Meıirjan men Meıirhandy on bes jylǵa jýyq ýaqyt tanımyn. On jyldaı birge talaı jobalardy birge júzege asyrdyq. Dos, baýyr, áriptes retinde aıtarym kóp.
Meıirhan da, Meıirjan da dosqa adal, peıili keń, esh aram oıy joq kóńili ashyq jaıdary jigitter. Ekeýi de úlken otbasyly, kópbalaly ákeler. Qarjy-qarajatqa muqtaj jandar da emes. Shyǵarmashylyqpen aınalysyp-aq sharýashylyǵyn domalatyp otyrǵan jigitter. Nege bulaı bolyp qalǵany meniń de mıyma kirip shyqpaıdy. Átteń osyndaı jaǵdaıǵa dýshar bolyp qaldy.
Bálkim ózderi de aldanyp qaldy ma eken? Qanshama jyl aralas-quralas, dos, áriptes retinde Meıirhan men Meıirjan osyndaı qara pıǵylmen dúnıe tapty degenge sene almaımyn. Bul iske bir eksperttik baǵa berýden nemese bireýdi aıyptaýdan aýlaqpyn. Sebebi bul istiń egjeı-tegjeıi kóp. Sondyqtan ǵaıbattaýǵa, syrttan ton pishe salýǵa sizder de asyqpańyz, dostar. Tergeý bolǵan soń, syrt kózge belgili aqparat pen istiń bizge áli belgisiz tustary da bary anyq. Sondyqtan sottyń ádil ótýine úmitimiz mol. Bar aıtarym, men biletin Meıirhan men Meıirjan mundaı olqylyqqa barmas edi. Esh senbeımin! Sene almaımyn.
Sondyqtan bir qatelik oryn alǵan bolar dep oılaımyn. Men zańger emespin. Kóp detalderin bilmeıtin de shyǵarmyn. Degenmen sottyń ádil bolýyn qalaımyn. Bul is barlyq taraptar úshin oń sheshilip jaqsylyqpen bitedi dep úmittenemin. Barlyǵy jaqsy bolady!
Marat ORALǴAZIN
