Qyrǵyzstandaǵy balalar «Balapan» telearnasyn kórip, qazaqsha sóılep úırengen. Olardyń qatarynda qyrǵyz depýtaty Nurjigit Qadyrbekovtiń qyzdary da bar. Bul týraly depýtat Qyrǵyz Respýblıkasynyń Jogorký Kenesh otyrysynda baıandaǵan.
Ol tek qazaq tilinde sapaly kontent usynatyn «Balapan» telearnasy qyrǵyz búldirshinderiniń aınymas serigine aınalǵanyn aıtady. Sondaı-aq, depýtat joǵary minberde «Balapan»-dy negizge alyp, qyrǵyz balalar telearnasyn da tek memlekettik tilderinde, qyrǵyzsha kórsetetin kanal etip ózgertýdi usynǵan.
Sebebi, «Balastan» qazir qyrǵyz jáne orys tilderinde habar taratady.
«Qazaqstan» telearnasynyń tilshisine bergen arnaıy suqbatynda depýtat qyrǵyz búldirshinderi súıip kóretin «Balapan» arnasynyń qyzmetin joǵary baǵalap, ondaǵy jobalar otbasylyq qundylyqtardy nasıhattaıtynyn jáne bala paıymyna laıyqtalyp jasalǵanyn atap ótti.
«Balapan» – bul eń myqty kanal. Balalardyń psıhologııasyn eske alyp daıarlanǵan. Kontenti ábden baı. Jaǵymdy. Tálim-tárbıe, balalarǵa tarıhty úıretip otyrǵan baǵdarlamalar bar», - deıdi Nurjigit Qadyrbekov.
2010 jyly ashylǵan «Balapan» arnasyn búginde Qazaqstan aýmaǵynda jalpy eseppen 2 mıllıonnan astam abonent kóredi.
Osy ýaqytqa deıin telearnada 302 telejoba, 21 telehıkaıa jáne jalpy bólim sany 3 myńǵa jýyq 103 anımaııalyq joba jasalyp, efırden ótken. Aıryqsha atap óterligi, «Balapan» Kantar kompanııasy júrgizetin reıtıng júıesi boıynsha otandyq úzdik 10 telearnanyń ishinde sońǵy eki jyl qatarynan 7-orynda tur.
Bıyl da arnanyń balalarǵa usynar bazarlyǵy mol. Arna ujymynyń aıtýynsha, efırden shyǵatyn tanymdyq, oıyn-saýyq baǵdarlamalar sany artady. Sonymen qatar, kórermen kózaıymyna aınalǵan «Toqty men Serke» anımaııalyq jobasynyń jańa serııalary jasalyp jatyr eken.
Bıyl 100 jyldyǵy toılanyp jatqan jeztańdaı ánshi Roza Baǵlanovanyń jáne jarq etken maıtalman sportshy Bekzat Sattarhanovtyń balalyq shaǵyna arnalǵan ádemi mýlthıkaıalar da jańa maýsymda efırge shyǵady.
”Adyrna” ulttyq portaly
