Qazaqstandaǧy NewTimes.kz jaŋalyqtar saity 14 säuırde "Roskomnadzordan" Ukrainadaǧy soǧys turaly materialdy alyp tastau turaly eskertu alǧan. Būl turaly halyqaralyq Internews Network ükımettık emes ūiymynyŋ jobasy - "Jaŋa reporter" habarlady.
NewTimes.kz direktory Dmitrii Kimnıŋ aituynşa, 14 säuırde basylym redaksiiasy Reseidegı BAQ-ty retteitın mekemeden eskertu alǧan. "Roskomnadzor" būl saitta "zaŋdy būzatyn aqparat jariialanǧanyn" eskertken.
"Naqty sılteme körsetılgen. Onda Euroodaqtyŋ jaŋa sanksiialary turaly mälımet berılgen. Bız ony BBC News-tıŋ Orys qyzmetıne sılteme jasai otyryp jariialaǧanbyz. Eskertude "Resei Federasiiasy Qaruly küşterı ötkızıp jatqan arnaiy äskeri operasiiasynyŋ qoǧamdyq maŋyzy jönınde jalǧan aqparat" jariialanǧany aitylǧan”, — deidı Dmitrii Kim.Sait direktorynyŋ aituynşa, "Roskomnadzor" eskertu joldanǧan uaqyttan bır täulık ışınde mälımettı alyp tastau kerektıgın jazǧan. Talapty oryndaudan "bas tartqanda nemese eşqandai äreket bolmaǧanda" hosting-provaider saitqa şekteu engızuge mındettı, dep mälımdegen reseilık mekeme.
"Eskertu bızge qazaqstandyq hosting kompaniia arqyly keldı. "Roskomnadzor" oǧan öz uäjın joldap, "aqparat resursyna tez aradaǧa habardar etudı" mındettegen. "Roskomnadzor" hosting kompaniia arqyly äreket etetının eskersek, mūndai eskertu bızden basqalarǧa da joldanǧan degen tūjyrym jasauǧa bolady", - deidı Kim. NewTimes.kz direktorynyŋ habarlauynşa, 15 säuırde saittan "Roskomnadzorǧa" ūnamaǧan mälımet alynǧan. "Köp oilanuǧa uaqyt bolmady. Bızge bır täulık qana berdı. Reseidegı auditoriianyŋ bızdıŋ saitqa kıre almai qalǧanyn qalamadyq", - deidı Kim. "Roskomnadzor" 24 aqpanda Ukrainadaǧy soǧys bastalǧaly berı Qazaqstandaǧy būqaralyq aqparat qūraldarynyŋ jūmysyna bırınşı märte aralasyp otyr. Resei Ukraina aumaǧyna basyp kırgelı berı federasiia aumaǧynda senzura küşeidı. Resei bilıgı köptegen täuelsız jäne şetel basylymdaryn būǧattady. Olardyŋ arasynda Azattyq radiosy men onyŋ jobalary da bar.
“Adyrna” ūlttyq portaly
