Reseılik Birinshi arna Ýkraınadaǵy soǵysqa qarsy shyqqan "Segodnıa vecherom" baǵdarlamasynyń júrgizýshisi Maksım Galkındi baǵdarlamadan shettetti. Galkınniń ornyna bıshi Nıkolaı ıskarıdze júrgizýshi bolyp keledi, dep habarlaıdy "Adyrna" portaly "Komsomolskaıa pravda" gazetine silteme jasap.
Jýyrda "StarHıt" Galkın soǵysqa baılanysty aıtqan sózderi úshin baǵdarlamadan shettetiletinin jazǵan. Telejýrnalıst Marııa Borzýnova qupııa derekkózge súıene otyryp, reseılik ázilkeshpen kelisim-sharttyń úzilýi onyń soǵysqa qarsy málimdemesimen tikeleı baılanysty ekenin aıtqan. Arna resmı túrde túsinikteme bermedi.
Ýkraınada soǵys bastalǵaly beri Maksım Galkın Reseı bıliginiń áreketin synap, qantógisti toqtatýǵa shaqyryp keledi. Qaqtyǵys tusynda Maksım Galkın men áıeli, ánshi Alla Pýgacheva Reseıden ketken.
Galkın – soǵys bastalǵaly beri efırden kórinbeı ketken jalǵyz federaldyq arna júrgizýshisi emes. Birinshi arna Vladımır Pozner men Ivan Ýrganttyń baǵdarlamalaryn da efırden alyp tastaǵan. "Chto? Gde? Kogda?" baǵdarlamasy tikeleı efırden berilmeıtin bolǵan, al "Mojem obıasnıt" basylymynyń jazýynsha, oıynǵa qatysyp júrgen kóptegen jastar jobadan ketken, alty adamnan quralǵan komandalardyń keıbirinde bir-eki adam ǵana qalǵan.
"Rossııa 1" arnasynda Sergeı Brılevtiń "Vestı v sýbbotý" baǵdarlamasy da efırge shyqpaı qalǵan. Resmı aqparat boıynsha, ol issaparǵa ketken.
"Adyrna" ulttyq portaly
