Qazaqstannyŋ tūŋǧyş prezidentı Nūrsūltan Nazarbaev saiasatker Daniiar Äşımbaevqa bergen sūhbatynda otstavkaǧa ketkennen keiın nemen ainalysyp jürgenın aitty, dep habarlaidy “Adyrna” ūlttyq portaly.
"Jalpy saiasatkerdıŋ otstavkaǧa ketkennen keiın nemen ainalysatyny maŋyzdy emes dep sanaimyn. Saiasatkerler keledı, ketedı, al halyq pen el qalady. Būdan görı elımızdıŋ odan ärı qalai damityny jäne aldymyzda qandai özgerıster kütıp tūrǧany maŋyzdyraq", - dedı Nazarbaev saiasattanuşy Daniiar Äşımbaevqa bergen sūhbatynda.
Tūŋǧyş Prezident el basqarǧan jyldary barlyq körşımen, batys älemınıŋ elderımen senımge negızdelgen qarym-qatynas ornaǧanyn atap öttı.
“Qazaqstandy halyqaralyq saiasi arenada qūrmetteidı. Qazaqstandyqtar şetelge demaluǧa nemese ıskerlık saparǧa emın-erkın şyǧady. Olarǧa ärdaiym qūrmetpen qaraidy. Qazaqstandyqtar şetelden jūmys ızdemeidı. Menıŋ otstavkamnan keiın kezınde bırge ıstegen köptegen memlekettıŋ liderı maǧan habarlasyp, öz elderıne qonaqqa şaqyrdy. Men olardyŋ bärıne rizamyn. Keibırımen älı künge deiın bailanysymyz üzılgen joq", - deidı ol.
Nazarbaev Euraziialyq ekonomikalyq odaq, Türkı memleketterı ūiymynyŋ qūrmettı töraǧasy ekenın eske saldy. Özı qūrǧan qordyŋ jūmysyna da köŋıl bölu qajet ekenın aitty. Sondai-aq jahandyq iadrolyq qauıpsızdık mäselelerı de nazardan tys qalmaǧanyn atap öttı.
"Būǧan qosa öz ömırım men qyzmetım jaily estelıktermen jūmys ıstep jatyrmyn. Bügınde menıŋ oiym da, tılegım de – Qazaqstannyŋ tūraqtylyǧy men güldenuı jaily. Bızdıŋ ūrpaǧymyz bızden de köp ıs tyndyrǧanyn qalaimyn. Olarǧa şyn jürekten būl ıste tabys tıleimın", - dep tüiındedı Nazarbaev.
“Adyrna” ūlttyq portaly
