Almaty oblysynyń ákimi Qanat Bozymbaev Taldyqorǵan qalasyndaǵy I.Jansúgirov atyndaǵy Mádenıet saraıynda ornalasqan № 974 saılaý ýchaskesinde bolyp, referendýmdaǵy óz tańdaýyn jasady.
Jalpy derek boıynsha Almaty oblysynda 1 392 237 saılaýshy bar. Olar 1053 saılaý ýchaskesinde daýys beredi dep kútilýde. Al aımaqtaǵy saılaý ýchaskeleri tańǵy saǵat 7.00-den keshki 20.00-ge deıin jumys isteıdi.
Sondaı-aq referendýmǵa 1074 komıssııa tartylǵan, onyń ishinde 21 komıssııa aýmaqtyq jáne 1053 komıssııa ýchaskelik mártebege ıe. Qazirgi sátte olarda barlyǵy 7636 komıssııa múshesi saılaýshylarǵa qyzmet kórsetýde. Referendým ýchaskelerinde baqylaýshylar da óz mindeterin atqaryp jatyr, ázirge oblys aýmaǵynda zań buzý deregi tirkelgen joq.
