QR Bilim jáne ǵylym mınıstri Ashat Aımaǵambetov mektepterde oramal taǵý máselesine qatysty pikir bildirdi, dep habarlaıdy «Adyrna» tilshisi.
«Mektepterde oramal taǵý máselesi tek bizdiń elde ǵana emes, basqa da birqatar elde únemi qyzý talqylanyp keledi. Biraq Qazaqstan – zaıyrly memleket jáne mektep te zaıyrly mekeme. 2016 jyly qabyldanǵan buıryqta talaptar kórsetilgen. Degenmen ártúrli toptardyń ınklıýzıvtiligin qamtamasyz etý mańyzdy ekenin kórip otyrmyz. Mysaly, basyna oramal taǵý múmkindigi bolmaǵandyqtan ata-anasy sabaqqa jibermeıtin qyzdardyń máselesin alyp qaraýǵa bolady. Osyndaı sebepterge baılanysty balalar mektepke barmasa nemese qashyqtan oqýǵa kóshýge májbúr bolsa, onda ol keri áserin tıgizedi. Jalpy biz ınklıýzıvti qoǵam bolýymyz kerek»,– dep túsindirdi ol.
