Elbasynyń «Bolashaqqa baǵdar: rýhanı jańǵyrý» baǵdarlamasy aıasynda Ońtústik Qazaqstan oblysy Báıdibek aýdanynda ejelgi dástúrimizdi qaıta jańǵyrtý maqsatynda «Qymyzmuryndyq» festıvali ótti. Sharanyń maqsaty – jurtshylyqtyń ulttyq mádenıet men salt-dástúrge qyzyǵýshylyǵyn arttyrý jáne jastardy salaýatty ómir saltyna tárbıeleý, sondaı-aq qazaq halqynyń ulttyq sýsyny – qymyzdyń qundylyǵyn nasıhattaý.
Ulttyq sýsyn merekesine oblys ákimi Janseıit Túımebaev, oblystyq maslıhattyń depýtattary, óńir ardagerleri men zııaly qaýym ókilderi, etnomádenı ortalyqtardyń tóraǵalary jáne respýblıkalyq, oblystyq blogerler men BAQ qyzmetkerleri qatysty.
Festıvalde alǵashqy bolyp sóz alǵan óńir basshysy Janseıit Qanseıituly aıtýly merekemen quttyqtap, dástúrdiń mán-mańyzyna toqtaldy.
«Salt-dástúrimizdi qaıta jańǵyrtyp, jas urpaqqa úlgi retinde uıymdastyrylyp otyrǵan «Qymyzmuryndyq» festıvaliniń orny orasan zor. Bul degenimiz — erte zamanǵy tamyrymyzǵa qaıta oralý. Qymyzmuryndyq – bıe baılap, alǵashqy qymyz ishý toıy jáne yntymaqtyń, eńbektiń, birliktiń merekesi. Bıe saýylyp, onyń súti qorlanyp, ashytylǵan soń eki-úsh kún boıy jınalǵan qymyzǵa aqsaqaldar men kórshi-qolańdar Qymyzmuryndyqqa shaqyrylǵan. Iaǵnı alǵashqy qymyz adamdarǵa saltanatpen usynylyp, «kópke buıyrsyn» degen tilekpen berilgen. Qazaqta sýsynnyń Qunan qymyz, Dónen qymyz, Ýyz qymyz, Jazǵy qymyz, Túnemel qymyz sııaqty túrleri bar. Bulardyń árqaıysynyń daıyndalý tásili de ártúrli. Dástúr boıynsha halqymyz bul merekede «Saýar kóp bolsyn!», «Aq mol bolsyn!», «Aýzymyzdy aqtan aıyrmasyn» dep tilek aıtysqan, olaı bolsa búgingi «Qymyzmuryndyq» toıy qutty bolsyn!», – dedi aımaq basshysy.
Sondaı-aq, aıtýly is-shara aıasynda qymyz baptaýshylar saıysy, qolóner sheberleriniń kórmesi, qulyndy bıe jáne sáıgúlikterdiń sherýi, ulttyq at sport túrlerinen kórinister, qymyz ishý saıysy ótti. Saıystarǵa 15 aýdan, qalalardan úmitkerler qatysyp, jeńimpazdar oblys ákiminiń arnaıy syılyǵymen, dıplomdarmen marapattaldy.
Budan bólek, óńirdegi barlyq aýdan, qalalar kıiz úı tigip, ony bezendirip, etnoaýyl uıymdastyryp qonaqtarǵa merekelik kóńil-kúı syılady.
Qymyzmuryndyq festıvalinde qymyz baptaýdan bas júldeni Túlkibas aýdanynyń úmitkerleri ıelendi. Taý baýraıynda baptalǵan bal qymyzǵa jurtshylyq rıza boldy. Bas júlde ıegerlerine qulyndy bıe tartý etildi. Birinshi oryndy Báıdibek aýdanynyń qymyz baptaýshylary enshilese, ekinshi jáne úshinshi oryndardy Túrkistan qalasy men Ordabasy aýdanynyń úmitkerleri ıemdendi.
Qolónershiler baıqaýynda túrkistandyq sheberlerdiń baǵy jansa, sáıgúlikter saıysynda Shymkent qalasynyń atbegileri jeńimpaz boldy. Jurtshylyq nazaryn aýdarǵan qymyz qumarlar básekesine barlyq aýdannan óte yntaly azamattar qatysty. Asa qyzyqty ótken jarysta 10.5 tostaǵan qymyzdy toqtamaı simirgen Arys qalasy, Montaıtas aýylynyń turǵyny Almas Jamanqulov jeńiske jetti. Jeńimpazdar men júldegerlerge aqshalaı syılyqtar tapsyryldy. Sonymen qatar, qymyz baptaý saıysyna qatysqan úmitkerlerge yntalandyrý syılyqtary tabys etildi.
alashaqparat.kz
