Saiasattanuşy Mūhtar Seŋgırbai keşe Sankt-Peterburgte ötken jiyn Qasym-Jomart Toqaev üşın jariia saiasat tūrǧysynan öte auyr şara bolǧanyn aitty, dep habarlaidy "Adyrna" ūlttyq portaly.
Ol būl turaly özınıŋ pıkırın feisbuktegı paraqşasynda jazdy.
"Körşısıne agressiia jasap, bükıl Batys älemınen bölınıp qalǧan eldıŋ basşysymen sahnada qatar otyrdy. Iаǧni, bırneşe saǧat boiy batysqa qarsy mysqyl, kekesın, menmenşıl ritorikany tyŋdauǧa mäjbür boldy.
Onyŋ üstıne jiyndy şovinistık mälımdemelerımen, sonyŋ ışınde Qazaqstanǧa qatysty qitūrqy sözderımen belgılı bolyp, «arnaiy operasiiany» qoldauşylardy basqaryp jürgen Margarita Simonian jürgızdı. Ekı aiǧa jetpeitın uaqyt būryn ǧana onyŋ küieuı, rejisser Tigran Keosaian Qazaqstannyŋ atyna auyr aiyp taǧyp, bırneşe mälımdeme jasaǧan edı. Şara soǧysty aqtap, Batysty jamandauǧa arnaldy. Qazaqstan basşysy sol ūzaq-sonar agressiiaşyl mälımdelerdı «tyŋdauşysy» boldy.
Ūiymdastyruşylar aldyn ala boljady ma, joq pa, Putin men Toqaevtyŋ sözderı bır-bırın joqqa şyǧaratyn pıkırsaiys boldy. Toqaev Ukrainadaǧy soǧysty synamaǧanymen, Putinnıŋ bıraz sözın diplomatiialyq türde joqqa şyǧaryp, aşyq pozisiiasyn aityp otyrdy. Sondaǧy eŋ batyl sözı – «LNR» men «DNR»-dy moiyndamaityny boldy. BŪŪ jarǧysyna süienu arqyly ol Putinnıŋ «halyqaralyq jariia qūqyqqa» sıltep, soǧysty aqtaǧan sözıne qarsy şyqty", — dep jazdy ol.
Saiasattanuşy Toqaev Qazaqstanda Ukrainadaǧy soǧysqa qatysty ärkelkı pıkır bar ekenın, elde «aşyq azamatty qoǧam ösıp-jetılgenın» aitu arqyly aqparattyq izoliasiiaǧa ūşyrap, «soǧys» sözı üşın on jylǧa qamaityn zaŋ şyǧaryp, oqşaulanyp jatqan Reseige qaraǧanda bızde äraluan pıkır bar degendı meŋzegendei bolǧanyn atap öttı.
"Putinnıŋ «Batys bermei qoiǧan zattyŋ bärın basqa jaqtan alamyz ne özımız şyǧaramyz» degen sözıne Toqaev bırneşe ret qarsylyq bıldırdı. «Qazırgı zamanda tolyq oqşaulanu mümkın emes» dedı Qazaqstan basşysy. Qazaqstannyŋ egemendıgıne qatysty dauly mälımdemeler jasaǧan Resei deputattaryna, Tigran Keosaianǧa qatysty mälımdemesın Toqaev ädeiı aitty. Oǧan būl jönınde sūraq ta qoiylmaǧan edı. Iаǧni Qazaqstan basşysy osyndai «soǧysşyl atmosferanyŋ» aiasynda qalyp qoiatynyn bılıp, sol sözın ädeiı daiyndap barǧandai äser qaldyrdy", — dedı saiasattanuşy.
Eske sala keteiık, keşe Prezident Toqaev Reseide «Jaŋa älem – jaŋa mümkındıkter» atty Peterburg halyqaralyq ekonomikalyq forumynyŋ 25 jyldyǧyna arnalǧan jiynnyŋ plenarlyq otyrysyna qatysqan bolatyn.
"Adyrna" ūlttyq portaly.
