Keshe ǵana qyzylordalyq fototilshi Bolat Omarálıevtiń sıýjetke bergisiz bir sýretiniń jaıyn qozǵap, «Jalǵyz tal jaýqazyn» degen maqala jazǵanbyz. Shynymyzdy aıtsaq, sýrettiń tarıhynan góri, fototilshiniń sheberligin tanytý basty maqsatymyz edi. Jetpisinshi jyldardaǵy birbetkeı boıjetkenniń bolmys-bitimin bir kadrǵa syıǵyzǵan Bolat aǵanyń qarym-qabiletine súısingenimiz ras-ty. Belgisiz arý... Deregi joq... Beınesi ǵana bar... Sodan búkil Syr boıynyń jurty sáıgúlik mingen sulýdy jabyla izdep ketti. Ásirese, Keńes Mahambetov (Kenesbek Mahambetov), Dáýlet Barǵanaev (Daýlet Barganaev), Nartaı Tursanov (Týrsanov Nartaı) syndy el azamattary bir kezdegi sámbitaldaı symbatty boıjetkendi tappaı qoımaımyz dep, bar janyn saldy.
Aqyry tabyldy-aý, Bolat aǵamnyń keıipkeri! Qyzylordanyń irgesindegi J.Mahambetov aýylynda turady eken. Bireýden ilgeri, bireýden keıin, qarapaıym tirshilik keship jatqan shýaqty shańyraq. Dereý oblystyq «Syr boıy» gazeti basshylarynyń biri Dáýirjan Elýbaevqa (Daýırjan Elýbaev) telefon shaldyq. Arnaıy tilshi jiberip, jaı-kúıimen tanysyp, ápkemizdiń búgingi keıpin sýretke túsirtip alý jóninde ótinish jasadyq. «Aǵa, tilshi-pilshini qaıtemiz, Nurbolatty ertip, ózim baram!», – dedi Dáýirjan batyr salǵan jerden. «Syr boıynyń» saıypqyrany Nurbolat Nurjaýbaı – Bolat Omarálıevtiń jolyn jalǵaǵan kánigi fototilshilerdiń biri. Árıne, aldymen «Keıipkerińiz tabyldy ǵoı, aǵa! Ózińiz baryp túsirip qaıtpas pa ekensiz?», – dep, ataqty maıtalmannyń ózine qolqa salǵanbyz. Kózdegenin múlt jibermes fotomergen eptep syrqattanyp qalypty. Sodan soń Nurbolat bahadúr fotomyltyǵyn ońtaılap, aǵasynyń ornyna «ańǵa shyqty»...
Hosh, búgin túske deıin bizdiń Dáýirjan jasy alpys ekige kelgen apasymen armansyz áńgimelesti. Ile-shala biz de qońyraý shaldyq. Bolat aǵanyń bir kezdegi keıipkeri Úrláı Júmekova ótken ómirin saǵynyshpen eske alyp, edáýir syr aǵytty. Daýysy sańqyldap tur. Shańyraqtaǵy segiz balanyń úlkeni eken. Jas kúninen muǵalim bolýdy qalasa da, ákesine járdemdesip, sharýasyna bolysyp, qoı baǵypty. Sóıtip, ábden eńbekte shyńdalypty. Bul aýyldyń jastar brıgadasy da sol kezde tarap ketken kórinedi. Biraq bul qyz ol brıgadaǵa múshe bolmapty. Belgili shopan retinde tóńirekke keń tanylǵan ákesi Nurtaıdyń adymyn uzartyp, sholaq kúreńine minip, jaılaýdyń tóri men qystaýdyń mańynda jalǵyz jortypty. Sondaı bir sátterde aýylǵa kelgen juqaltań fotograf Bolat Omarálıevtiń qaraýylyna ilikken. Áleýmettik jelini sharlap ketken sýretti kórip, kózine jas alypty. Qalaı, qashan túskeni esinde joq. Tek jetpisinshi jyldardyń aıaǵy shyǵar dep shamalaıdy. «Osyndaı bir sýret ilgeride úıde bar sekildi edi, biraq dál mynadaı keıiptegisin alǵash ret kórip turmyn», – deıdi Úrláı Nurtaıqyzy.
Reti kelgende aıta keteıik, bul aýyldaǵy brıgadanyń aty «Jaýqazyn» emes, «Juldyz» eken (Sol jyldarda Shıeli jaqta «Jaýqazyn» degen brıgada bolmaǵanyn aldymen anyqtaǵan – jedeldigine jurt qyzyǵatyn jýrnalıst áriptesim Qaragóz Simádil. Sol úshin qanshama shaı ázirleýge ketetin altyn ýaqytyn bólip, ulttyq kitaphanaǵa baryp, irili-usaqty basylymdardyń bárin aqtaryp shyqty). Álgi brıgadanyń ornalasqan jeri Shıelige emes, Syrdarııa aýdanyna jaqyn kórinedi. E, meıli, eki mıllıondaı sýret túsirgen, ony qarańǵy úıge qamalyp, túrli qospalarǵa salyp, bylǵap otyryp shyǵarǵan Bolat aǵam anda-sanda qatelespeıdi ǵoı deısiń be?!
Eń bastysy, onyń keıipkeri – sáıgúlik mingen sulýdyń tabylǵany! «Amanbysyń, atty arý?», – dep jazyp edik keshe ǵana. Arýymyz aman eken, shańyraǵy shattyqqa toly eken!
Tek ol búginde baıaǵydaı jalǵyz tal jaýqazyn emes, japyraǵy jaıqalǵan báıterekke aınalǵan. Otaǵasy Nurlan Ermekov ekeýi bes bala (bir balasy ilgeride shetinegen) tárbıelep ósiripti. Eki ul, eki qyzdan on úsh nemere súıip, qudaı qalasa, áne-mine dep, alǵashqy shóberesin kútip otyrǵan ádemi ájeniń keıpine engen. Endigi sózdi Úrláı apasymen saǵattap otyryp syrlasyp qaıtqan degdar inimiz Dáýirjanǵa qaldyraıyq... Sóıle, Dáýir, jyrla, Dáýir... Búgin seniń kúniń!
Sonymen, bir kezdegi jalǵyz tal jaýqazynnyń syry mine, sýreti áne! O basta tektilerdi túsirgen, túp tarıhyn túsingen maıtalman fototilshiniń ǵajaıyp túısigine qalaısha tań qalmassyń?! Áı, qaıran Bolat aǵam, týsań tý!
Baýyrjan OMARULY
