Jalǧyz tal jauqazyn

Būl siujetke bergısız syrly surettı qyzylordalyq fototılşı Bolat Omaräliev jetpısınşı jyldarda tüsırıptı. Eldı eleŋ etkızgen şūbartaulyqtardyŋ äigılı bastamasynyŋ törtkül dünienı tügel jailap tūrǧan kezı. Mektep bıtıruşıler jappai auylda qalyp, komsomol-jastar brigadasyn qūryp, şetınen qoi baǧuǧa attanyp jatty. Tegınde, keŋes däuırındegı bastamanyŋ bırazy osylai dürıldep bastalatyn da, köp ūzamai aiaǧy sūiyla beretın. Ädepkıde eŋbektı ekpındetıp äketken belsendı brigadalardyŋ qatary köp ūzamai seldırei tüsetın. Bıraq bärıbır būl bastamany jappai qoldau şart. Uaqyttyŋ talaby solai. Sondai bır kezeŋde Syr boiyndaǧy Şielı öŋırınde «Jauqazyn» degen komsomol-jastar brigadasy öz aldyna otau tıgedı. Oblystyq basylymnyŋ basşylary Şielıde jaiqalǧan «Jauqazynnyŋ» jai-küiın bılıp, suretke tüsırıp keluge qol-aiaǧy jeŋıl fototılşı Bolat Omarälievtı jūmsaidy. Oralhannyŋ «Qasqyr ūlyǧan tün» degen äŋgımesındegı zamanymyzdyŋ säulettı selosy turaly maqala jazuǧa tapsyrma alǧan gazet tılşısı sekıldı Bökeŋ salyp ūryp jetıp kelse, el bolyp maqtap jürgen «Jauqazynymyz» baiaǧyda sabaǧy qurap, tamyry solyp qalypty. Berekesızdık jailaǧan brigada qūramyndaǧy otyzǧa tarta qyz-jıgıt bırtındep qaşyp-pysyp, tügelge juyq qarasyn batyrypty da, jalǧyz-aq osy qyz ketpei qoiypty. Ne şynymen eŋbekten jerımegen, ne namysy jıbermegen... Äiteuır öz ömırıne yrza deidı. «Otyzdan – özım, Kördı ǧoi közım, Jalǧyzdyq körer jaiym joq», – dep, Abai atasynyŋ ızımen öleŋdetıp jürgen körınedı. Ärine, menıŋ aqköŋıl Bolat aǧamnyŋ qandai jaǧdai basyna tüsse de, Oraǧaŋnyŋ keiıpkerı sekıldı tapsyrmany oryndamai, qūr qol qaityp kelgen jerı joq. Esesıne, tūtas ömır şyndyǧynyŋ aşy-tūşysyn aralastyryp otyryp, tarihqa taŋbalap beredı ol. Būl joly da söittı. Känıgı közmergen oŋtaily sättı aŋdyp jürıp, jūrtta qalǧan jalǧyz tal «jauqazyndy» fotomyltyǧynyŋ qarauylyna ılıktıredı. Sol qadırlı kadr, mıne, osy... Osylai endı, şyrt etkızgenı şedevr... Jalpy, suret-puret bolmasa, qyz-pyzben şaruasy joq Bolat aǧam sol boijetkennıŋ keiıngı taǧdyry qalai örıstegenın mülde bılmeidı. Tıptı onyŋ atyn da, zatyn da esınde saqtamaǧan. Eh, Böke... Söituge bola ma endı?! Jaraidy, bopty... Şynynda da, jetpısınşı jyldarda qyrdyŋ sänı bolǧan Şielınıŋ sol bır jalǧyz tal jauqazyny qaida eken qazır? Japyraǧyn jaiyp, kögerıp-köktep, ösıp-önıp, baiaǧyda-aq gülbaqşaǧa ainalǧan şyǧar... Qaidasyŋ, säigülık mıngen sūlu? Barsyŋ ba jer betınde? «Sen qalǧan otyz ūldan edıŋ Zäureş», – degendei, bır kezde jailauda jalǧyz jortqan qaitpas qaisar äjelerıŋnıŋ derek-däiegın nege ızdemeisıŋder-ei, bar bolǧyr nemereler? Ne körındı senderge? Al, kettık... Izdeu salaiyq! Amanbysyŋ, atty aru?