Qyzylorda oblysynyŋ Şielı audanyndaǧy 2 eldı meken kögıldır otynǧa qosyldy

Oblys äkımı Nūrlybek Nälıbaev Şielı audanyna jasaǧan jūmys sapary aiasynda Aqmaia, Alǧabas auylyn kögıldır otynǧa qosu saltanatty şarasyna qatysty. 

Aimaq basşysy aldymen Aqmaia eldı mekenı tūrǧyndaryn qūttyqtap, halyqtyŋ tūrmysyna qajettı auyz su, gaz tartu, jol salu mäselelerınıŋ kezeŋ-kezeŋımen şeşıletının tılge tiek ettı.

- Eldı mekenderdı kögıldır otynmen qamtamasyz etu qarqyndy jüzege asyp, audannyŋ jaŋa tynysy aşylyp keledı.  Sonyŋ dälelı – biyl Şielı kentı 100 paiyz gazben qamtyldy. Jaqaev, Bidaiköl, Baisyn, N.Bekejanov, Qodamanov eldı mekenınıŋ tūrǧyndary kögıldır otyn igılıgın köruge mümkındık aldy. Osyndai nätijelı jūmystyŋ arqasynda audan halqynyŋ äleumettık jaǧdaiy jaqsaryp, tūrmysy tüzelude. Tabiǧi gaz – tırşılıktı jeŋıldetıp qana qoimai, qorşaǧan ortany qorǧauǧa, orman qoryn saqtauǧa zor mümkındık beredı. Sondyqtan igılıktı ıstıŋ adamzat üşın paidasy zor, - dedı Nūrlybek Nälıbaev.

Būǧan deiın auyl halqy jyl saiynǧy eseptı kezdesude eldı mekenge kögıldır otyn jürgızudı jiı köterıp kelgen. Bügın Aqmaia auylyndaǧy 500-ge juyq tūrǧyn üi tabiǧi gazben qamtamasyz etıldı. Aita keteiık, būl maqsatqa respublikalyq, jergılıktı biudjetterden 460 mln.teŋge qaralǧan. Al, Alǧabas auylyndaǧy 600-ge juyq üidı tabiǧi gazben qamtuǧa respublikalyq jäne jergılıktı biudjetten 488 mln.teŋge bölıngen. Saltanatty şaraǧa qatysqan öŋır basşysy auyl halqynyŋ ömır süru deŋgeiı qalalyqtarmen teŋeskenın jetkızıp, quanyştaryna ortaqtasyp, aqjarma tılegın jetkızdı. Aita keteiık, aldaǧy uaqytta Şielı audanyna qarasty Bestam, Dosbol datqa, Eŋbekşı, Jidelıaryq eldı mekenderıne gaz qūbyryn jürgızuge qajettı biudjettık ötınım tapsyrylsa, Almaly, Täjıbaev eldı mekenderıne gaz qūbyryn jürgızudıŋ joba-smetalyq qūjattamalary äzırlenıp, saraptamaǧa ūsynyldy. Biyl auyldyq eldı mekenderdı gazdandyru boiynşa 13 jobany ıske asyru bastalsa, onyŋ 7-uı osy jyly aiaqtalady. Nätijesınde, 15 myŋnan astam halqy bar 7 eldı meken tabiǧi gazǧa qol jetkızıp, ony tūtynatyn halyq sanynyŋ ülesı 68 paiyzǧa jetpek. Bügınde Şielı audanyn tabiǧi gazben qamtu ülesı 56,4% qūraidy.