Jetısu oblysynyŋ äkımı ardagerlermen kezdesıp, öŋırdı damytu mındetterın talqylady

Jetısu oblysynyŋ äkımı Beibıt İsabaev Taldyqorǧandaǧy Ardagerler üiınde bolyp, aqsaqaldarmen kezdestı. Öŋırdı damytudyŋ aldaǧy maqsat-mındetterı jaily äŋgımelesıp, pıkır almasty, - dep habarlaidy Jetısu oblysy äkımınıŋ baspasöz qyzmetı. Ol aldymen jaŋa qūrylyp jatqan oblysty örkendetu baǧytynda Prezidenttıŋ jüktegen tapsyrmalary töŋıregınde oi örbıttı. Sol maqsattarǧa qol jetkızu üşın mejelenıp otyrǧan jüielı josparlaryna da qysqaşa toqtaldy. Sonymen bırge jaŋa saiasi özgerısterge sai halyqpen pıkırlesıp, ardagerlermen aqyldasa otyryp jūmys ısteudıŋ maŋyzdylyǧyn atap öttı. - Jetısu ölkesınen Nūrmolda Aldabergenov, Zyliha Tamşybaeva, Nikolai  Golovaskii, Nūrlan Oŋaldinov, Tynybai Baltabaev, Zakariia Seiıtova, Kümısbek Buaşev, Küläş Aitjanovalardai daŋqty Eŋbek Erlerı şyqqan. Bız eŋbek adamynyŋ biık tūlǧasyn qalyptastyrmai, osy atalǧan Eŋbek Erlerın därıptemei, qazırgı jastardy ızgılıkke bauli almaimyz. Öskeleŋ ūrpaqty eŋbekqorlyqqa tärbieleu – ortaq paryzymyz, - degen B.İsabaev jastar tärbiesındegı, qoǧamdyq qūndylyqtardy qalyptastyrudaǧy ardagerlerdıŋ rölıne toqtaldy. Jäne osy jolda bırlesıp eŋbek etuge, ardagerlerdıŋ aqyl-keŋesterın, ūsynys-tılekterın tyŋdauǧa äzır ekenın jetkızdı. Eŋbek ardagerlerı Ermek Kelemseiıt, Nauryz Qylyşbaev, Qadyl Janasbekov jäne basqa da azamattar öz sözderınde jaŋa oblystyŋ ırgesın nyǧaituǧa qolynan kelgen kömegın jasaityndyqtaryn aitty. Bırqatar audandarda mektepterdı jöndeu, tūrǧyn üi qūrylysyna jer bölu, qūrylysqa qarqyn qosu siiaqty özektı mäseleler bar ekenın mysal ettı. Oilaryn «Bıreudıŋ boilap öskenınen köpşılıktıŋ qaulap öskenı jaqsy» degen qanatty sözben tüiındep, oblys basşysynyŋ eldıŋ tūrmys jaǧdaiyn köterudegı jospar-jobalarynyŋ, baǧyt-bastamalarynyŋ jemıstı boluyna tılektestıgın bıldırdı.