Búgin Jetisý oblysynyń ákimi Beıbit Isabaev turǵyndarmen alǵashqy kezdesýin Eskeldi aýdanynda ótkizdi. Qarabulaqtaǵy mádenıet úıinde ótken jıynda oblys basshysy kópshilikti óńirdiń áleýmettik-ekonomıkalyq damýynan qysqasha habardar etip, aýdan basshylyǵynyń aldyna naqty mindetter qoıdy. Kezdesýde turǵyndar negizinen aýyz sý men aryq júıesin júrgizý, gazdandyrý, áleýmettik nysandardy jóndeý men salý, jaıylymdyq jer máselelerin kóterdi, - dep habarlaıdy Jetisý oblysy ákiminiń baspasóz qyzmeti.
Beıbit Isabaev El Prezıdenti oblys basshylyǵynyń aldyna azamattardyń turmys jaǵdaıyn, ál-aýqatyn arttyrýǵa qatysty problemalardy sheshý men Jetisý oblysyn áleýmettik-ekonomıkalyq turǵydan odan ári damytý mindetterin qoıǵanyn atap ótti. Sol sııaqty Eskeldi aýdanynyń ekonomıkasyndaǵy erekshelikterge, basymdyq beretin baǵyttarǵa toqtaldy. Máselen, aýdan qant qyzylshasyn egýden aımaqta 1-shi orynda, ıaǵnı oblystaǵy jalpy egistiktiń 29%-yn quraıdy. Sonymen qatar aýdannyń kartop sharýashylyǵyn, onyń ishinde Chıpsy men Frı óndirisin damytý áleýeti zor.
- Alaıda aýdanda óńdeýshi kásiporyndar joq, syıymdylyǵy mol zamanaýı kókónis saqtaý qoımalary jáne tońazytqyshtary joqtyń qasy. Mal sharýashylyǵynda mal basynyń sany 50 myńǵa jýyq bolsa da, nebary 4 bordaqylaý alańy jáne 2 shujyq ehy bar. Jylyna orta eseppen 34 myń tonna sút óndiriledi, 7 taýarly sút fermasy bar, biraq tek 2 mekeme ǵana sút ónimderin shyǵarady. Bul jetkiliksiz, - dedi oblys basshysy.
Sol sııaqty paıdalanylmaı jatqan aýyl sharýashylyǵy jerlerin anyqtap, memleket menshigine qaıtarý jumystaryna, jańa ınvestıııa tartyp, óńdeý ónerkásipterin ashý, jumys oryndaryn qurý, balyq jáne jylyjaı sharýashylyqtaryna nazar aýdarý, aýyz sý, gazdandyrý, sýarý jelilerin júrgizý sııaqty kóptegen máselelerge basa kóńil bólýdi tapsyrdy. «Syrtqy naryqqa baǵdarlana otyryp, sapaly aýyl sharýashylyǵy ónimderin óndirý úshin jańa tehnologııalardy belsendi engizý kerek», - dedi B.Isabaev. Buǵan deıin Eskeldi aýdanynda ákimderdiń nebary bir jyl kóleminde ǵana jumys istep ketkenin tilge tıek etken oblys basshysy aldaǵy ýaqytta kelesi taǵaıyndalatyn ákimniń óz qyzmetin neǵurlym uzaq merzim atqarýyna, bastaǵan jobalaryn aıaqtaýyna múmkindik bergen jón ekenin atap ótti.
Osy jıynda jalpy sany 15 turǵyn 40-qa jýyq suraq qoıdy. Saýaldardyń basym kópshiligi aýyz sý men baqsha sýaratyn aryq sýyna qatysty boldy. Osy máselelerdi Kókjazyq, Jańalyq, Aqyn Sara, Melkombınat, Baıysov aýyldarynyń turǵyndary kóterdi. Sol sııaqty eldi mekenderge gaz tartý máselesi de - kópshiliktiń mazalaıtyn taqyryptardyń biri. Jalpy aýdannyń ortalyq aýyz sý júıesimen qamtylý deńgeıi joǵary bolǵanymen, 40% jeliniń tozyǵy jetken. Qazir Qarabulaq, Aqtuma, Aqeshki, Syrymbet, Aldabergenov, Terekti aýyldarynda sýmen qamtý júıeleriniń qurylysyn júrigizý men qaıta jańǵyrtý qolǵa alynýda. Taǵy eki aýylda osyndaı qurylystyń qujattary ázirlenip jatyr. Sondaı-aq ázirge aýdandaǵy 3 eldi mekenge ǵana gaz jetkizilgen. Ótken jyly 4 aýylǵa gaz taratý jelisin salý bastalsa, bıyl taǵy 4 aýyl osyndaı josparǵa engizilip, qarjysy qarastyrylǵan. Solardyń ishinde turǵyndary saýal qoıǵan Kókjazyq, Baıysov aýyldary da bar. Sondaı-aq aıtylǵan saýal-ótinishter negizinde oblys ákiminiń orynbasary Álibek Jaqanbaevtyń jetekshiligimen arnaıy komıssııa birneshe aýyldaǵy aryq júıesiniń kemshilikteri, ony túzetý joldaryn qarastyratyn bolady.
Aldabergenov aýylynyń turǵyny Madııar Aqjoltaev erekshe qajettiligi bar bala tárbıelep otyrǵan ata-ana retinde balalardy ońaltý ortalyǵyn ashý týraly usynys bildirgen edi. Ótinishke baılanysty aýdan basshylyǵynyń aıtýynsha, atalǵan aýylda bos turǵan eski mekteptiń ǵımaratyn paıdalanýǵa bolady. Beıbit Isabaev aldymen ǵımarattyń jaramdy-jaramsyzdyǵy týraly tıisti mamandarǵa saraptama jasatyp, anyqtaý kerektigin aıtty. «Balalardyń ómirine qaýipsiz bolsa, onda sol ǵımaratty qalpyna keltirip, ortalyq jasaýǵa bolady. Eger qaýip bolsa, onda basqa jolyn qarastyrý kerek. Balalardyń ómiri biz úshin bárinen qymbat», - dedi oblys ákimi.
Shymyr aýylyna balabaqsha jáne stadıon, Jalǵyzaǵash aýylyna mádenıet úıi, Jańalyq, Eshkiólmes aýyldaryna mektep kerek degen usynystaryn jetkizgen aýdan turǵyndaryna Beıbit Isabaev:
- Aýdandar bólinisinde áleýmettik nysandardyń sany qansha, hal-ahýaly qandaı, halyq sanyna qaraı suranys deńgeıi qandaı, sonyń bárine tolyq túgendeý júrgizemiz. Sol boıynsha kelesi jyly birinshi kezekte qandaı nysandar salynady, aldaǵy 3-5 jyldaǵy mejemiz qandaı, bıýdjettiń múmkindigine qaraı osynyń bárin josparlap, jumys jasaıtyn bolamyz, - dedi.
Kezdesýden keıin oblys ákimi jeke azamattar úshin qabyldaý ótkizdi.
