Qazaqstan mūsylmandary dıni basqarmasynyŋ töraǧasy, bas müfti Nauryzbai qajy Taǧanūly qazaqstandyqtardy Qūrban ait meiramymen qūttyqtady, dep habarlaidy “Adyrna” ūlttyq portaly.
Asa Qamqor, erekşe Meiırımdı Allanyŋ atymen bastaimyn!
Qadırlı jamaǧat!
Barşaŋyzdy ūlyq meiram – Qūrban aittyŋ keluımen şyn jürekten qūttyqtaimyn! Ait qabyl bolsyn!
Sızderge amandyq pen saulyq, bırlık pen bereke tıleimın.
Qūrban ait – şynaiy niet pen Allaǧa degen süiıspenşılıktı paş etetın meiram. Ūlyq merekenıŋ tärbielık mänı men maǧynasy osynda jatyr.
Qasiettı Qūranda: «Ūmytpaŋdar, olardyŋ etı de, qany da eşqaşan Allaǧa jetpeidı. Oǧan jetetın närse – jürekterıŋızge ūialaǧan taqualyqtaryŋ (şynaiy nietterıŋ)» («Haj» süresı, 37-aiat), – delıngen.Aiatta aitylǧandai, Qūdai jolynda jaqsylyq jasauǧa niettengen pende būl amaldy riiasyz oimen oryndaidy. Adam balasy qūrbandyq şalu arqyly Allanyŋ bergen rizyq-nesıbesıne şükır etedı. Qūdaidyŋ näsıp etken nyǧmettıŋ bır bölıgın kömekke mūqtaj jandarǧa ülestırıp, olardyŋ da aqysyn berıp, quanyşqa böleidı. Öitkenı, Paiǧambarymyz Mūhammed (oǧan Allanyŋ salauaty men sälemı bolsyn): «Paryz amaldan keiıngı Allaǧa ūnamdy ıs – mūsylmannyŋ jüregıne quanyş syilau» degen.
Halqymyz «Bota alǧanşa bata al» deidı. Ülkennıŋ, jalpy kömekke mūqtaj jandardyŋ alǧysyn alyp, batasyna bölenu – ait kezınde oryndalatyn sauapty ıstıŋ bırı.Mūsylman balasynyŋ ūlyq künde şynaiy nietpen qūrban şalyp, qūrbandyq etın mügedekter men jetımderge, köpbalaly otbasylar men qarttarǧa taratyp, olardyŋ alǧysyn aluǧa tyrysatyny sondyqtan. Osy rette elımızdegı barşa käsıpker azamattardy Qūrban aittyŋ qūrmetıne mal qūnyn qoldan kötermei, halyqtyŋ äleumettık jaǧdaiyn eskerıp, oŋtaily baǧa ūsynuǧa, jūrt künde tūtynatyn azyq-tülıkke mümkındıgınşe jeŋıldık jasauǧa şaqyramyn. Qūrban aittyŋ negızgı mänı mūsylmandar arasynda özara meiırımdılık, jomarttyq, qaiyrymdylyq, qanaǧat syndy adamgerşılık qūndylyqtardy qalyptastyru ekenın esten şyǧarmaǧan abzal. Allanyŋ raqym nūry tögıletın aitta jūrtymyzǧa jaqsylyq jasap, köpşılıktıŋ rizaşylyǧyna böleneiık. Qūrmettı otandastar! Bügınde älem mūsylmandary ekı jylǧa sozylǧan üzılısten keiın ülken qajylyq jasauda. Solardyŋ qatarynda Mekke qalasynda qajylyq paryzyn ötep jürgen 4 myŋ otandasymyzdyŋ nietı men dūǧasy qabyl bolyp, elımızge aman-esen oraluyn tıleimız. Alla Taǧala elımız ben jerımızge berekesın jaudyryp, şalǧan qūrbandyqtarymyzdy, bergen sadaqalarymyzdy, ait künderı amalǧa asyrǧan Allaǧa ūnamdy ärbır igı ısterımızdı qabyl etkei. Aittan aitqa aman-esen jete bereiık. Ämin!
“Adyrna” ūlttyq portaly
