Qazaqstan elektr quatyn basqa elderden satyp almauy kerek. Būl turaly prezident Qasym-Jomart Toqaev energetika salasynyŋ qyzmetkerlerımen kezdesu barysynda aitty, dep habarlaidy «Adyrna» tılşısı.
«Tüptep kelgende, būl – ūlttyq qauıpsızdık mäselesı. Būdan bölek, elımızdıŋ zor energetikalyq mümkındıgın tiımdı qoldanu qajet. Mysaly, Qazaqstan – kömırge bai el. Jyl saiyn 110 million tonnadan astam kömır öndırıledı. Osy strategiialyq artyqşylyqty dūrys paidalanǧan jön. Bız zamanaui ülgıdegı «taza kömır» tehnologiiasyna tezırek köşuımız kerek. Sol arqyly kömır stansiialarynyŋ tiımdılıgın arttyra tüsemız»,-dedı ol.
Prezident bırneşe qalada jylu elektr ortalyqtaryn salu kerektıgın atap öttı.
«Kurchatov qalasynda jylu elektr stansiiasyn, Kökşetau, Semei, Öskemen qalalarynda jylu elektr ortalyqtaryn salu qajet. Osy nysandardyŋ barlyǧyna «taza kömır» tehnologiiasyn engızu kerek. Şyndyǧyn aitsaq, būl jobalardyŋ jüzege asuy äbden sozylyp kettı. Endı ary qarai kütuge bolmaidy»,- dedı Qasym-Jomart Toqaev.
Aita keteiık, elımızdegı üş qalada JEO salu jönındegı kelısımge 2024 jyly qol qoiylǧan. Qūjatta Resei tarapynan Qazaqstanǧa jeŋıldetılgen eksporttyq nesie beru közdelgen bolatyn. Alaida ötken köktemde vise-premer Roman Skliar būl qarjylandyrudy alu mäselesı tuyndaǧanyn mälımdedı. Onyŋ aituynşa, eger Resei tarapy qarajat böle almasa, Qazaqstan jaŋa investorlar ızdeuge mäjbür bolady.
Şılde aiynda Qazaqstan tarapy Kökşetaudaǧy JEO qūrylysyn öz qarjysymen bastaǧany belgılı boldy. Al tamyzda jobaǧa qytailyq merdıgerler tartylǧany habarlandy.
Juyrda Qazaqstannyŋ energetika ministrı Erlan Aqkenjenov nysanda qazırgı uaqytta jer qazu jūmystary jürgızılıp, qūrylys alaŋy daiyndalyp jatqanyn aitty. Sonymen qatar ol Qazaqstannyŋ älı künge deiın Reseiden Semei men Öskemen qalalaryndaǧy qalǧan ekı JEO qūrylysyna arnalǧan jeŋıldetılgen nesie boiynşa jauap ala almaǧanyn jetkızdı.
