Oqý-aǵartý mınıstri Ashat Aımaǵambetov kópqabatty úıdiń terezesinen qulap ketkeli turǵan balany aman alyp qalǵan elordalyq mektep túlegi Esdáýlet Dáýitbekovpen kezdesti. Sondaı-aq kezdesýge 17 jastaǵy batyrdyń anasy Ásemgúl Qabdyqalyqova da qatysty. Bul týraly vedomstvonyń baspasóz qyzmeti jazdy, dep habarlaıdy «Adyrna» tilshisi.
Ashat Aımaǵambetov Esdáýletke kórsetken qaısarlyǵy úshin alǵysyn bildirip, ózinen kishilerge kómek berýge jáne olardy qorǵaýǵa daıyn bolýy elimizdiń barlyq oqýshysy úshin úlgi-ónege ekenin atap ótti.
«Sizge kórsetken qaısarlyǵyńyz ben batyldyǵyńyz úshin alǵys aıtqym keledi. Siz oqýshynyń mektep qabyrǵasynan qalaı túlep ushýy kerek ekenin dáleldedińiz. Osyndaı asyl, batyr azamatty tárbıelegen ata-anańyz ben ustazdaryńyzǵa alǵys aıtamyn.
Prezıdent búgin mektepterdegi býllıng faktilerine alańdaıtynyn aıtqan edi. Sizdiń búgingi erligińiz laıyqty úlgi bolady. Joǵary synyp oqýshylary da siz sııaqty kishkentaılardy qoldaýǵa jáne qorǵaýǵa árqashan daıyn bolady dep senemin.
Sonymen birge kámeletke tolmaǵan balalardyń ata-analarynan olardyń úıdegi qaýipsizdik máselesine basa nazar aýdarýyn suraımyn», - dedi vedomstvo basshysy.
Kezdesý sońynda Ashat Aımaǵambetov Esdáýlet Dáýitbekovke alǵys hat pen estelik syılyqtar tabys etti. Sondaı-aq mınıstrdiń ótinishi boıynsha túlekke Almatydaǵy Narhoz ýnıversıtetinde tegin oqýǵa grant berildi.
«Joǵary bilim berý sapasymen tanymal jáne áleýmettik qoldaý kórsetýde belsendi pozıııany ustanatyn elimizdegi jetekshi joǵary oqý oryndarynyń biri Narhoz ýnıversıtetine alǵysymyz sheksiz», - dedi Ashat Aımaǵambetov.
Aıta keteıik, Esdáýlet Dáýitbekovtiń ata-anasy alty bala tárbıelep otyr.
