Jetınşı qabattan qūlaǧaly tūrǧan balany qūtqaryp qalǧan jasöspırımge 3 bölmelı päter berıldı. Būl turaly QazAqparat tılşısıne batyr jıgıt Esdäulet Däuıtbekovtıŋ özı mälım ettı, dep habarlaidy «Adyrna» tılşısı.
«Bızdı bügın G-Park kompaniiasy şaqyrdy. 3 bölmelı päter berdı. Erteŋnen bastap qūjattardy räsımdeimız dedı. Al, bızdıŋ däl qazırgı tūryp jatqan üiımızdı ipotekaǧa alǧanbyz», - dedı Esdäulet Däuıtbekov.Sonymen qatar, Esdäulet oqiǧanyŋ män-jaiyn özı tolyq baiandap berdı.
«Men aulada futbol oinap jürgenmın. Körşılerdıŋ barlyǧy jinala bastady. Men de baryp män-jaidy bılmek boldym. Söitsem, kışkentai bala terezenıŋ aldynda tūr eken. Terezege maskettık tor taǧylǧan. Ol üzıluge säl qalypty. Keiın men 7-qabatqa köterılıp, bala tūrǧan üidıŋ esıgın qaqtym. Üide ülkenderden eşkım bolmady. Sosyn päter iesenıŋ rūqsatymen körşı üidıŋ balkonynan şyǧyp, balany aman saqtap qaldym dep aita alamyn. Büldırşın şamamen 3 jasta. Üige kırgende päterde taǧy da üş bala bar eken. Anasy dükenge ketken. Men balalardyŋ anasy kelgenge deiın büldırşındermen bırge boldym. Körşıler polisiia jäne tötenşe jaǧdailar qyzmetkerlerın şaqyrdy. Olar bır saǧattan keiın ǧana keldı. Al, bala ölım men ömır arasynda tūr ǧoi. Sol bır saǧattyŋ ışınde ne bolatynyn bır Qūdai bıledı. Sondyqtan, oǧan deiın qarap tūra almadym», - dedı ol.Batyr jıgıt būl äreketın marapat alu üşın jasamaǧanyn jetkızdı. Degenmen, ony elep-eskergen qala tūrǧyndary men laiyqty qūrmet körsetıp jatqan jandarǧa alǧysyn bıldırdı.
