28 şılde künı «Kazakhstan Petrochemical Industries Inc.» JŞS qyzmetkerlerıne Atyrau qalasyndaǧy «Fransuz oramy» tūrǧyn üi keşenınen jaŋa päterlerdıŋ kıltı tabystaldy.
Saltanatty räsımge «QazMūnaiGaz» ŪK AQ Basqarma töraǧasy Maǧzūm Myrzaǧaliev jäne «Kazakhstan Petrochemical Industries Inc.» JŞS Basqarma töraǧasy Daniiar Tiesov qatysty.
Öndırıske ısker mamandardy tartu jäne olardy yntalandyru maqsatynda «KPI Inc.» JŞS tūrǧyn üi baǧdarlamasyn daiyndaǧan. Jaŋa tūrǧyn üi paiyzsyz jäne bastapqy jarnasyz bölıp töleu arqyly berıledı.
«Jaqyn arada elımızde ülken öndırıs — polipropilen öndıretın zauyt ıske qosylady. Bolaşaqta ony tūraqty paidalanu üşın bızge qyzmetkerlerdıŋ mol täjıribesı men sabaqtastyǧy öte maŋyzdy. Sondyqtan «Samūryq-Qazyna» qory, «QazMūnaiGaz» jäne KPI kompaniiasy arnaiy tūrǧyn üi baǧdarlamasyn äzırlep, öndırıstegı qyzmetkerlerge qoldau körsetu jäne qajettı jaǧdai jasau üşın jaŋa päterlerdı ūsyndy», - dep atap öttı M. Myrzaǧaliev.Jaiyq özenınıŋ jaǧasynda ornalasqan az qabatty tūrǧyn üi keşenınıŋ 1, 2 jäne 3 bölmelı päterlerı taza, ärlengen küiınde tapsyryldy. Abattandyrylǧan aulada balalar alaŋy, basketbol-voleibol sport alaŋdary jäne jeke qazandyǧy ornatylǧan. Atyrauǧa sapary barysynda M.Myrzaǧaliev polipropilen öndıretın «KPI Inc.» JŞS zauytyna da bardy. Onda propilendı polimerleu, qoimada propan men daiyn önımdı saqtau (buyp-tüiu jäne buyp-tüiu toraby), ortalyq operatorlyq jäne äkımşılık-tūrmystyq korpus jūmysymen tanysty. Qazırgı uaqytta jobanyŋ jalpy progresı 99,40%-dy qūraidy, zauytta ıske qosu-retteu jūmystary aiaqtaluda. Käsıporyn quaty jylyna 500 myŋ tonna polipropilen öndıre alady. Būdan basqa, Basqarma töraǧasy «Butadien» jobasyn ıske asyruǧa arnalǧan alaŋǧa bardy. «Butadien» JŞS Bas direktory Diaz Diianov QMG basşylyǧyna bolaşaq nysannyŋ ornynda jürgızıletın jūmystardy tanystyrdy. Esterıŋızge sala keteiık, 2021 jyldyŋ qaraşa aiynda «QazMūnaiGaz» ben «Tatneft» kompaniiasy butadien kauchukterın öndıru boiynşa bırlesken käsıporyn qūrdy. Käsıporynnyŋ josparlanǧan quaty – jylyna 66 myŋ tonnaǧa deiın butadien men 83 myŋ tonnaǧa deiın sintetikalyq kauchuk jäne basqa da önımder öndıru. Jobanyŋ aldyn ala qūny 916 mln AQŞ dollarǧa baǧalandy, aiaqtalu merzımı - 2025 jyl. Qazırgı uaqytta joba boiynşa geodeziia jäne geologiia boiynşa jūmystar jürgızıldı, käsıporyn öndırıstık obektıler men jalpy zauyttyq şaruaşylyqty jobalauǧa kırıstı. Butadien kauchukterın öndıruge arnalǧan şikızat Qazaqstannyŋ Teŋız jäne Korolev ken oryndarynan jetkızıledı, dep boljanuda. Daiyn önımdı Qaraǧandy oblysyndaǧy Şina zauytyna, sondai-aq Europa elderıne, Reseige, Qytaiǧa, Türkiiaǧa jäne t. b. elderge eksporttau josparlanyp otyr. Polipropilen öndıretın zauyt jäne «Butadien» jobasy integrasiialanǧan gaz-himiia keşenınıŋ (İGHK) aumaǧynda ıske asyryluda.
