Euronews arnasyna bergen sūhbatynda BŪŪ-daǧy İrannyŋ tūraqty ökılı Äli Bahreini qazırgı Taiau Şyǧystaǧy şielenıstı toqtatudyŋ jalǧyz joly - İzraildıŋ äskeri qimyldaryn doǧaru ekenın mälımdedı, dep habarlaidy "Adyrna" ūlttyq portaly.
Onyŋ aituynşa, eger İzrail şabuyldaryn toqtatsa, diplomatiiaǧa ümıt bar. Alaida, AQŞ qaqtyǧysqa aralasqan jaǧdaida, İran oǧan qarsy küş qoldanatynyn eskerttı.
"Europalyqtar ıstei alatyn äreket - İzraildı aiqyn aiyptap, oǧan qoldau körsetudı doǧaru", - dedı Bahreini.
Ol Europanyŋ İzrail agressiiasyna köz jūmuy men İrannyŋ iadrolyq kelısımın saqtap qaluda qauqarsyzdyq tanytuy qazırgı äskeri şielenıstıŋ uşyǧuyna sebep bolǧanyn aitty.
"İzraildıŋ eş jazaǧa tartylmauy - Europa, AQŞ jäne BŪŪ Qauıpsızdık Keŋesınıŋ äreketsızdıgınıŋ nätijesı", - dep mälımdedı ol.
Bahreinidıŋ aituynşa, Europa İzrailge körsetılıp jatqan äskeri, qarjylyq jäne barlau kömegın toqtatuy tiıs. Sonymen qatar, İrannyŋ iadrolyq baǧdarlamasyna qatysty şynaiy ūstanym bıldıruı kerek.
Būl mäseleler 21 mausym künı Jenevada ötetın kelıssözderde Fransiia, Germaniia jäne Ūlybritaniianyŋ syrtqy ıster ministrlerıne jetkızıledı. Jiynda İrannyŋ iadrolyq baǧdarlamasy talqylanbaq.
İran būǧan deiın iadrolyq baǧdarlamasy boiynşa Bırlesken jan-jaqty ıs-qimyl josparyna (JCPOA) qatysqan. Būl kelısım aiasynda eldıŋ iadrolyq qyzmetıne şekteu qoiylyp, sanksiialar jeŋıldetılgen edı. Alaida 2018 jyly Donald Tramp būl kelısımdı AQŞ atynan būzyp, jaŋa sanksiialar engızdı. Osydan keiın Tegeran uran baiytudy qaita jalǧastyrdy.
Qazır İran urandy 60%-ǧa deiın baiytyp jatyr, būl äskeri maqsattaǧy 90%-dan tömen bolǧanymen, JCPOA rūqsat bergen 3,67%-dan bırneşe ese joǧary. İran iadrolyq baǧdarlamasynyŋ tek beibıt, azamattyq maqsatty közdeitının aitady. Al İzrail, kerısınşe, İran iadrolyq qaru jasap jatyr dep esepteidı.
Sūhbatta Bahreini AQŞ-tyŋ qaqtyǧysqa aralasuy jaǧdaiynda İrannyŋ jauapsyz qalmaitynyn aşyq aitty.
"Qaruly küşterımız jaǧdaidy baqylauda ūstap otyr. AQŞ-tyŋ äreketın baǧalap, qajet bolsa soqqy beruge daiyn", - dedı ol.
Äli Bahreinidıŋ aituynşa, däl qazırgı jaǧdaida qandai da bır diplomatiialyq bastama turaly aituǧa bolmaidy.
"Bızdıŋ halqymyz ben elımız üşın basty mındet - agressiiany toqtatu. Agressorlardy toqtatudan basqa eşteŋe turaly oilauǧa da, aituǧa da bolmaidy", - dep qorytyndylady ol.
