Prezident Qasym-Jomart Toqaev medisina qyzmetkerlerıne küş qoldanuǧa qatysty jazany qataŋdatudy tapsyrdy, dep habarlaidy "Adyrna" ūlttyq portaly.
Prezidenttıŋ keŋesşısı ärı baspasöz hatşysy Ruslan Jeldıbaidyŋ mälımetınşe, Memleket basşysy Parlament deputattary, medisina salasynyŋ ökılderı men belsendı azamattardyŋ densaulyq saqtau qyzmetkerlerıne küş körsetu jäne qatygezdık tanytqandarǧa qatysty jazany küşeitu jönındegı ūsynystaryn qoldaidy.
«Prezident Ükımetke zaŋnamaǧa tiıstı özgerıster men tolyqtyrular äzırleudı tapsyrdy. Būl özgerıster azamattyq qoǧam ökılderınıŋ qatysuymen Parlamentte talqylanatyn bolady», – delıngen habarlamada.
Eske salaiyq, būǧan deiın Qaraǧandyda jeke klinikada nauqas därıgerge şabuyl jasaǧan bolatyn. Oqiǧa medisinalyq mekeme ışınde bolǧan jäne beinejazba äleumettık jelıde tez taraǧan.
