Qarashanyń 3-inde aqyn, jýrnalıst Nurtaı (Karl) Ernazarov qaıtys boldy. Keshe ǵana áleýmettik jelide ókpesin qaratyp, aýrýhanadan shyqqanyn jazyp, dárigerlerge alǵysyn bildirgen edi. Bul jazbasynda ol medıına jáne jedel-járdem salasyndaǵy ózi baıqaǵan júıeli kemshilikterdi de sıpattaǵan. Kovıd indeti kezinde de áleýmettik jelide jazba qaldyryp, ertesinde dúnıeden ótken qalamgerler bolǵan. Myna jazba sol kezdegi kórinisti qaıta kóz aldyǵa ákelgendeı boldy...
Aıaǵyma jasalǵan otadan keıin qatty álsirep ketsem kerek, arada bir apta ótpeı qos ókpeden alyp tústi.
Dúrkin-dúrkin kóterilgen qyzý men jótel sharshatyp-aq tastady. Taǵy sol emhanaǵa telefon shalyp, terapevtiń qabyldaýyn suradym. Olar bul aptaǵa oryn joq dedi.
"Qalqam, jaǵdaı osyndaı bolyp tur. Men kómektese almaımyn".
Amal joq, bólim meńgerýshisine bardym, ol bir dárigerge jiberedi. Ol tyńdap kórip "sizde pnevmonıe joq" dep, birer dári jazyp berdi. Olardan kómek bolmady, tynys alý qıyndap barady.
Jedel járdem shaqyrdym, olar ekinshi qalalyq aýrýhanaǵa aparyp tastady, jerdiń túbi eken. Kezegim kelgende rengenge túsirip, olar da sizde pnevmonııa joq, sondyqtan sizdi jatqyza almaımyz tórtinshi aýrýhanaǵa baryp kórińiz, óz aýdanyńyz, solar emdeýge mindetti dedi.
Súıretilip sonda keldim, olar bizde ókpe emdeıtin bólim joq, Qalqamanǵa baryńyz dedi. Aýyryp áliń ketip turǵanda júrý qandaı aýyr, úıge jettim de quladym.
Áıel jumysta, balalar jan-jaqqa habarlasyp, keńes suraı bastady. Bireý shuǵyl túrde KT túsirińder depti. Japparqulda jan bar ma, oǵan da bardyq.
Ondaǵy jigit "aǵa, oń jaq ókpeniń bir bóligi ǵana saý, qalǵanyn túgel alyp qoıǵan, shuǵyl em almasańyz kesh bolady" dedi.
Taǵy jedel járdem, shaqyrdyq. Olar Qalqamandaǵy pýlmanologııa ortalyǵyna jetkizdi. Jol mundaı uzaq bolar ma, keshki keptelis jedel járdemdi de tutqyndap tastaıdy eken. Aýrýhanaǵa jete almaı talaı adam kóz jumǵan shyǵar-aý dep te oılap qoıam.
Baqsaq, bul da bir sheshýin tappaı kele jatqan problema eken ǵoı.
Aýrýhanaǵa jetkende júrýden qaldym, ary qaraı arbamen alyp ketti. Murynǵa kıslorod shlangasyn tyǵyp jiberip, tamyrdan tamshylatyp sýara bastady.
Qoıshy, ne kerek, sodan on bes kún degende qyzý basyldy, qybyrlap júre bastadym. Eger anda-mynda áýre qylmaı birden osynda jiberse, anaǵurlym jeńil bolǵandaı eken.
KT túskenge deıingi apparattar jaman ba álde dárigerler rengendi durys oqı almaı ma, sizde eshteńe joq dep sendirdi ǵoı, biraq nátıje kerisinshe bolyp shyqty.
Kovıd kezinde myqty sportsmen jigitterdiń bir-eki kúnde ketip qalǵanyn estip qaıran qalýshy edim, osy joly óz basymnan ótkizip baryp kózim jetkendeı boldy. Ókpe durys jumys istemegen soń aǵzaǵa ottegi jetpeı qozǵalýǵa shama kelmeı qalady eken.
Naqty emdeıtin jerge jetkenshe kedergi nege kóp?
Biraq ótkende mınıstr hanym osy júıe durys degendeı qyldy ǵoı. Aıtaıyn degenim óz jaǵdaıym emes, osy jaǵdaıdy bastan keship jatqan kóptiń birimin ǵoı, myna júıeniń osylaı jalǵasa bergeni durys pa, álde jańa utymdy tásilder qajet pe? Ozyq elderden tıimdi bir júıeni urlap alsaq ta myna jaǵdaıdy ózgertý kerek shyǵar? Aqyldy halyq artta qalǵan júıemen jumys isteı me?
Degenmen aýrýhana dárigerlerine alǵysym sheksiz, tabysty bolsyn. Búgin úıime kep rahattanyp qaldym, qara dombyramdy da saǵynyppyn. Biraq bir aıǵa deıin úıden shyǵýǵa, qonaq qabyldaýǵa tıym salyndy. Bul kún de óter. Aýyrmańyzdar.
