Qazaqstan Prezidentı Qasym-Jomart Toqaev pen Türkiia prezidentı Rejep Taiip Erdoǧan Qazaqstan-Türkiia Joǧary deŋgeidegı strategiialyq yntymaqtastyq keŋesınıŋ 5-şı otyrysyn ötkızdı, dep habarlaidy “Adyrna”.
Jiyn barysynda Memleket basşysy Türkiianyŋ ejelden bauyrlas, tamyrlas jäne tübı bır tuysqan el ekenın atap ötıp, ortaq tarihi jäne ruhani qūndylyqtarǧa negızdelgen qazaq-türık yntymaqtastyǧy keŋeitılgen strategiialyq serıktestık ruhynda tūraqty damyp kele jatqanyna nazar audardy.
“Bız osy sara joldy jalǧastyryp, özara bailanysty bügıngıden de biık beleske köteruge müddelımız. Qūrmettı Prezident myrza, Özıŋızben jaŋa ǧana şaǧyn qūramda ötkızgen kelıssözderdı joǧary baǧalaimyn. Bız yqpaldastyǧymyzdy keŋeituge nietımız bar ekenın taǧy da bekemdei tüstık. Oǧan bızdıŋ mümkındıgımız de, ynta-jıgerımız de jetkılıktı. Ekı eldıŋ arasynda auqymdy şarttyq-qūqyqtyq negız qalyptasty. Atap aitqanda, alpystan astam ekıjaqty şarttar men kelısımder bar. Bügın de bırqatar ekıjaqty kelısımge qol qoiylady”, – dedı Memleket basşysy.
Keŋeste özara sauda-sattyq kölemın ūlǧaitu mäselesı talqylandy. Byltyr özara sauda ainalymy 5 milliard dollar bolǧan. Būl körsetkıştı eseleuge barlyq mümkındık bar. Qasym-Jomart Toqaevtyŋ aituynşa, elımız Türkiia naryǧyna kemınde 34 türlı önım jetkızuge daiyn. Onyŋ kölemı 1 milliard dollarǧa juyqtaidy. Türkiiadan keletın tauar türlerın de arttyra tüsu maŋyzdy.
Taraptar tauar ainalymyn ūlǧaitu jolynda kölık-logistika salasynyŋ maŋyzy airyqşa ekenın atap öttı. Būl rette Qazaqstan Prezidentı Transkaspii halyqaralyq kölık baǧdaryn damytuǧa basa män berılıp otyrǧanyn jetkızıp, zamanaui temırjol, qūrlyqtaǧy porttar men jük terminaldaryn saluǧa jäne keme öndırısıne türık investisiiasyn tartuǧa müddelı ekenımızdı mälımdedı.
