Bügın, 5 tamyz künı Aqtau qalasynda oblys äkımı Nūrdäulet Qilybaidyŋ qatysuymen «QHA 30 jyl: bırlık pen kelısım» atty Qazaqstan halqy Assambleiasy etnomediatorlarynyŋ respublikalyq forumy öttı.
Auqymdy ıs-şaraǧa Qazaqstan halqy Assambleiasy töraǧasynyŋ orynbasary – QR Prezidentı äkımşılıgı QHA hatşylyǧynyŋ meŋgeruşısı Marat Äzılhanov sondai-aq, respublikalyq jäne öŋırlık etnomediasiia ortalyqtarynyŋ jetekşılerı, elımızdıŋ är öŋırınen kelgen delegattar, etnomediatorlar, aqsaqaldar men analar keŋesınıŋ müşelerı, ükımettık emes ūiym ökılderı men mäslihat deputattary, jergılıktı memlekettık organ ökılderı qatysty.
Auqymdy şara Prezident Qasym-Jomart Toqaevtyŋ: «Qazaqstan Respublikasynyŋ Mädeniet jäne aqparat, Işkı ıster, Ädılet ministrlıkterı müddelı memlekettık organdarmen, Astana, Almaty, Şymkent qalalarynyŋ jäne oblystardyŋ äkımderımen bırlesıp, Qazaqstan halqy Assambleiasynyŋ etnomediasiia salasyndaǧy jūmysyna jan-jaqty qoldau körsetsın, «Eldesu jäne tatulasu» jobasynyŋ auqymyn keŋeitsın»,-degen tapsyrmasy aiasynda öttı.
Forum barysynda etnomediasiia salasyndaǧy bırqatar maŋyzdy taqyryptar talqylandy. Atap aitqanda, öŋırlerdegı etnomediasiia institutynyŋ damu täjıribesı, etnosaralyq qatynastardy retteudegı tiımdı ädıster men praktikalyq keister, etnomediatorlardyŋ käsıbi daiarlyǧy men oqytu baǧdarlamalarynyŋ rölı söz boldy. 
Sonymen qatar, qatysuşylar etnosaralyq janjaldardyŋ aldyn alu algoritmderı, qoǧammen konstruktivtı özara ıs-qimyl jasau joldary, halyqaralyq täjıribeler jäne elımızde mediasiiany damytuǧa arnalǧan negızgı täsılder boiynşa pıkır almasty.
Jiyn barysynda oblys äkımı Nūrdäulet Qilybai eldıŋ damuy men qoǧamnyŋ dūrys baǧytta ılgerıleuı auyzbırşılık pen bırlık bolǧan jaǧdaida ǧana mümkın ekenın atap öttı.
- Memleket basşysy Qasym-Jomart Toqaevtyŋ BŪŪ Bas hatşysy Antoniu Guterrişpen kezdesuınde Bas hatşy Qazaqstandaǧy etnosaralyq tatulyq pen qoǧamdyq auyzbırşılıkke joǧary baǧa berıp kettı. Bız bır-bırımızge qoldau körsetıp, ortaq maqsatqa jūmylsaq qana öŋırımızdıŋ, elımızdıŋ äleuetın arttyra alamyz. Auyzbırşılık pen özara tüsınıstık bar jerde ǧana nätije de, damu da bolady. Sondyqtan yntymaǧymyzdy bekemdep, ony barynşa damytuymyz kerek,” – dedı öŋır basşysy.
Forumnyŋ soŋynda bırqatar azamattar Qazaqstan halqy Assambleiasynyŋ arnaiy marapattaryna ie boldy. Etnosaralyq tatulyq pen qoǧamdyq kelısımdı nyǧaituǧa qosqan ülesı üşın qatysuşylarǧa «Alǧys» medalı men merekelık alǧys hattar tabystaldy.
