Osydan 105 jyl būryn ROSTA-nyŋ Orynbor-Torǧai bölımşesı negızınde bırınşı qazaq aqparat agenttıgı, qazırgı «QazAqparat» halyqaralyq aqparat agenttıgı» qūryldy, dep habarlaidy «Adyrna» tılşısı.
1925 jyly agenttık aty «QazROST» bolyp özgertıldı. 1937 jyly «QazTAG» degen atpen Qazaq KSR Ministrler Keŋesınıŋ qarauyna berıldı. Arada 60 jyl ötkende, iaǧni, 1997 jylǧy qyrküiektıŋ 10-ynda QR Prezidentınıŋ №3629 Jarlyǧymen «Qazaq aqparat agenttıgı (QazAA)» respublikalyq qazynalyq käsıporny bolyp özgertıldı.
2002 jylǧy qaraşanyŋ 8-ınde QR Ükımetınıŋ №1186 qaulysyna säikes QazAAG negızınde «Qazaq aqparat agenttıgı» Ūlttyq kompaniiasy («QazAqparat» ŪK) qūryldy. 2008 jylǧy şıldenıŋ 3-ınde agenttık QR Ükımetınıŋ №668 qaulysyna säikes «Arna Media» Ūlttyq aqparattyq holdingı» aksionerlık qoǧamynyŋ qūramyna kırdı. Al 2012 jylǧy tamyzdan 2014 jylǧa deiın «Qazaqstan» RTRK» AQ qūramynda boldy. 2014 jyldyŋ qaŋtarynda «QazAqparat» eldegı alǧaşqy halyqaralyq aqparat agenttıgı (HAA) märtebesıne ie bolyp, öz tarihynyŋ jaŋa kezeŋın bastady. 2020 jyly «QazAqparat» Halyqaralyq aqparat agenttıgı» AQ qūramyna «QazKontent» AQ qosylyp, qaita qūryldy.
Agenttık ǧasyrdan astam uaqyt boiy saiasat, ekonomika, bılım, densaulyq, sport, mädeniet jäne qoǧam tynys-tırşılıgı turaly senımdı ärı jedel aqparat közı retınde bedelın mültıksız saqtap keledı.
