Petropavlda aqyn, oişyl, aǧartuşy Maǧjan Jūmabaevtyŋ esımın ielengen eldegı alǧaşqy ǧylymi-mädeni hab – «Maǧjan ortalyǧy» aşyldy. Būl turaly Ükımet saity jariialady, dep habarlaidy "Adyrna".
Habarlamada jaŋa ortalyq tek tarihi mūrany jaŋǧyrtu orny ǧana emes, ǧylymi zertteuler, mädeni-aǧartuşylyq baǧdarlamalar, halyqaralyq dialogtar men şyǧarmaşylyq jobalar jüzege asatyn zamanaui ziiatkerlık keŋıstık bolatyny aitylǧan.
Saltanatty şaraǧa qatysqan Premer-ministrdıŋ orynbasary Ermek Köşerbaev tarihi tūlǧalardy ūlyqtau – bızdıŋ paryzymyz ǧana emes, ol – täuelsızdıktıŋ ruhani tıregı, ūlttyq sana-sezımnıŋ berık ırgetasy ekenın atap öttı.
«Maǧjan Jūmabaev siiaqty bıregei tūlǧaǧa arnalǧan ortalyqtyŋ aşyluy – bükıl el üşın maŋyzdy oqiǧa. Maǧjan: «Men jastarǧa senemın» dedı. Bügınde onyŋ «Batyr Baian», «Qorqyt» poemalary, «Pedagogika» oqulyǧy jäne basqa da tuyndylary jas ūrpaqty otansüigıştıkke, elge adaldyqqa, jauapkerşılıkke tärbieleudı jalǧastyryp keledı. Būl ortalyq Maǧjan ruhyn jastarǧa jetkızıp, olardy batyl oilauǧa, abyroimen äreket etuge jäne tuǧan jerge adal boluǧa şabyttandyrady», – dedı Ermek Köşerbaev.
«Maǧjan ortalyǧynyŋ» ışkı keŋıstıgı aqyn tūlǧasynyŋ san qyryn jäne şyǧarmaşylyq mūrasynyŋ auqymyn körsetedı. Mūnda Maǧjan Jūmabaevtyŋ jūmys kabinetı tūrmystyq zattarymen bırge qaita jasalǧan. Ortalyqta konferens-zal, zamanaui kıtaphana, mūraǧat qūjattaryn zertteu kabinetı, «Maǧjan» jurnalynyŋ redaksiiasy jūmys ısteidı. İntelligensiiaǧa arnalǧan şyǧarmaşylyq alaŋ jäne «Maǧjantanu» ädebi kluby aşylyp, onda kezdesuler, pıkırtalastar, taqyryptyq keşter ötpek.
Ortalyq XIX ǧasyrdyŋ säulet eskertkışı märtebesıne ie ǧimaratta ornalasqan. Ǧimaratqa keşendı restavrasiia jürgızılıp, XIX ǧasyrdaǧy sirek kezdesetın alfreilı örnekter qalpyna keltırılgen. Dizainyn QR suretşıler odaǧynyŋ müşesı Bolat Äserbekov äzırlegen, al jūmystar Türkı mädenietı men mūrasyn saqtau qorynyŋ qoldauymen atqarylǧan.
