Bügın – müsınşı, ūlttyq käsıbi müsın önerınıŋ negızın saluşylardyŋ bırı, professor, Qazaq KSR Memlekettık syilyǧynyŋ laureaty, Qazaq KSR halyq suretşısı, Qazaqstannyŋ öner qairatkerı Häkımjan Nauryzbaevtyŋ tuǧanyna 100 jyl toldy.
Häkımjan Nauryzbaev Almatydaǧy Abaidyŋ, Şoqan Uälihanovtyŋ, M.İ. Kalininnıŋ, Tarazdaǧy Jambyl Jabaevtyŋ, Almaty oblysyndaǧy Jansügırov auylynda V.İ. Leninnıŋ eskertkışterın jasaǧan.
Müsınşınıŋ «Jas Jambyl», «Amangeldı İmanov», «Qūrmanǧazy», «Säken Seifullin», «Şoqan Uälihanov» siiaqty tarihi portretterı formanyŋ mūqiiat jasaluymen jäne kürdelı psihologiialyq sipatymen erekşelenedı.
1950 jyldardyŋ basynda Almatyda Abaiǧa eskertkış ornatu konkursyna Häkımjan Nauryzbaev qatysyp, 1960 jyly Abaidyŋ 115 jyldyǧyna arnalǧan monumenttı jasauǧa taŋdalady.
Jūmysqa kırıspes būryn ol Abaidyŋ tuǧan jerıne baryp, jergılıktı aqsaqaldarmen söilesıp, M.Äuezovtı keŋesşı etıp alady.
Auylşaruaşylyq institutynyŋ tar şeberhanasynda jasalǧan müsındı Äuezov jiı kelıp, jūmysty baqylap otyrǧan. Alǧaş körgende ol syn aitqanymen, soŋǧy nūsqasyn körgende: «Mıne, būl – Abai!» dep maqūldaǧan. Būl turaly müsınşı öz estelıkterınde bölısedı.
