Maŋǧystau oblysyndaǧy qorqynyşty jol apatynan qaza tapqandardyŋ tuystaryn Ūlttyq ūlannyŋ arnaiy ūşaǧy apat bolǧan aimaqqa qarai alyp ūşty, dep habarlaidy “Adyrna”.
Işkı ıster ministrlıgı sol arqyly marqūmdardyŋ artynda qalǧan jaqyndaryna qoldau körsetıp, demeu bolmaq.
«Işkı ıster ministrlıgıne qarasty Ūlttyq ūlannyŋ arnaiy borty jol apatynan qaza tapqan azamattardyŋ tuystaryn Maŋǧystau oblysyna alyp ūşty. Marqūmdardyŋ jaqyndary mäiıtterdı tanyp, qajettı qūjattardy räsımdeidı. Osy ūşaq qaza tapqandardyŋ denelerın öz aimaqtaryna jetkızıp beredı», - dep habarlady IIM resmi ökılı - departament bastyǧy Şyŋǧys Alekeşev.
Aqparatqa säikes, qaza tapqandardyŋ ışınde — bes äiel Qaraǧandy oblysynan, bıreuı Astana qalasynan barǧan äiel.
«Osylaişa, ışkı ıster ministrlıgı qaza tapqandardyŋ otbasylaryna jedel kömek körsetıp, mäiıtterdı tasymaldau jäne jerleu räsımıne şūǧyl kömek beredı», - dep habarlaidy derekköz.
Esterıŋızge sala keteiık, keşe, 11 qyrküiek künı Maŋǧystau oblysyndaǧy jantürşıgerlık jol apatynan 10 adam köz jūmdy. Tragediia 11 qyrküiek künı Qaraqiia audany Senek eldı mekenınen 90 şaqyrym qaşyqtyqta bolǧan.
