Almaty qalasynda qatty jauyn-şaşyn saldarynan jol opyrylyp, kölıkterge zaqym kelgen, dep habarlaidy «Adyrna» tılşısı.
Oqys oqiǧa Äuezov audanyndaǧy Amanjol köşesınde bolǧan.
Audan äkımdıgı apparatynyŋ mälımetınşe, «Spesstroi Grupp LTD» JŞS būǧan deiın Amanjol köşesınde taratu jelılerı jobasynyŋ aiasynda auyzsu jäne kärız injenerlık jelılerın jürgızu jūmystaryn tolyq kölemde aiaqtaǧan. Asfaltbeton jamylǧysyn qalpyna keltıru uaqytşa keiınge qaldyrylǧan.
«Būl «QazaqGaz» AQ tapsyrysymen 300 mm diametrlı bolat gaz qūbyryn tartu josparyna bailanysty qabyldanǧan şeşım edı. Jol tösemın qaita qazudan jäne tūrǧyndarǧa qolaisyzdyq tuǧyzudan saqtanu üşın qalpyna keltıru jūmystary gaz qūbyry töselgennen keiın jasaluǧa tiıs edı»,—dedı äkımdıktıŋ baspasöz qyzmetı.
Alaida jauyn suy qoldanystaǧy aryq jüiesı arqyly osy köşege jinalyp, jol tösemıne tüsetın salmaqty arttyrǧan.
«Būǧan qosa injenerlık jelılerdı alty metrge deiıngı tereŋdıkte jürgızu topyraq negızın jūmsartty. Osy jaǧdaiǧa jäne qatty nöserdıŋ äserı joldyŋ şöguıne jäne jabynnyŋ bülınuıne äkeldı. Sonyŋ saldarynan 2025 jylǧy 16 qyrküiekte jol jabynynyŋ opyrylyp, 13 avtokölık zaqymdandy. Qazırgı uaqytta Amanjol köşesı jabyldy. Endı kölıkterdı evakuasiialau, topyraqty şyǧaru jäne joldy tolyq tazartqanǧa deiın ballast töseu jūmystary bastalady»,—delıngen habarlamada.
Äkımdıktıŋ mälımetınşe, merdıger ūiym zaqymdanǧan avtokölıkterdıŋ ielerıne keltırılgen şyǧyndy tolyq öteidı. Mäsele Almaty qalasy äkımdıgınıŋ baqylauyna alynǧan.
