Qyrǧyzstan prezidentı Sadyr Japarov qūqyqtyq qamtamasyz etu basqarmasyna ölım jazasyn qaitarudy tapsyrdy. Būl turaly 1 qazanda memleket basşysynyŋ baspasöz hatşysy Ashat Alagözov aitty, dep habarlaidy «Adyrna» tılşısı.
«Zaŋnamaǧa balalar, qyzdar jäne äielderge qarsy qylmystar üşın jazany barynşa qataŋdatudy közdeitın özgerıster engızu boiynşa tapsyrma berıldı. Memleket basşysy balalar men äielderge qarsy jasalǧan qylmystar jazasyz qalmauy tiıs dep esepteidı», – dedı ol.
Būl şeşımdı Japarov Ystyqköl oblysynda 17 jastaǧy Aisūlu esımdı qyzdyŋ mert boluyna bailanysty qabyldaǧan. Boijetken 27 qyrküiekte joǧalyp ketken. Qūrbysyna qonaqqa barǧan qyz bailanysqa şyqpai qalǧan. Keiın onyŋ denesı Boom şatqalynan tabyldy.
Küdıktı retınde 41 jastaǧy Bışkek tūrǧyny ūstalyp, uaqytşa qamau izoliatoryna jabyldy. Tergeu nūsqasyna säikes, er adam qyzdy zorlap, artynşa öltırıp ketken. Ūstalǧan küdıktı qylmysyn moiyndady. Būǧan qosa, onyŋ būǧan deiın tonau jäne kısı öltıruge oqtalu qylmystary üşın sottalǧany anyqtaldy.
Aita keteiık, Qyrǧyzstanda ölım jazasy 2007 jyly küşın joiǧan edı. Al 2010 jylǧy jeltoqsanda el Azamattyq jäne saiasi qūqyqtar turaly halyqaralyq paktınıŋ ölım jazasyn joiuǧa baǧyttalǧan Ekınşı fakultativtık hattamasyn ratifikasiialaǧan.
