Tıl ǧylymynyŋ tarlanyn eske alu şarasyna QR Ǧylym jäne joǧary bılım ministrı Saiasat Nūrbek, Almaty qalasy äkımınıŋ orynbasary Azamat Qaldybekov, qoǧam qairatkerlerı, otandyq jäne şeteldık tıltanuşy ǧalymdar men ziialy qauym ökılderı qatysty.
Kongress barysynda Saiasat Nūrbek Memleket basşysy Qasym-Jomart Toqaevtyŋ qūttyqtau hatyn oqyp berdı:
“Şora Sarybaev – tıl ǧylymyn damytuǧa, onyŋ tarihyn tereŋ zertteuge airyqşa eŋbek sıŋırgen ǧibratty ǧalym. Ol ana tılımızdıŋ kökjiegın keŋeitıp, ǧylymi damuyna zor üles qosty. Belgılı akademik qazaq tılınıŋ aimaqtyq sözdıgın qūrastyru maqsatynda arnaiy ekspedisiialar ūiymdastyryp, ırgelı zertteuler jürgızdı. Qazaq jäne türkı tılderınıŋ dialektologiialyq atlasyn jasauǧa belsene atsalysty, tıl bılımınıŋ bibliografiiasyn äzırledı. Ǧalymnyŋ eŋbek jolyn otandyq ǧylymǧa degen adaldyqtyŋ ozyq ülgısı deuge bolady”,- delıngen Prezident qūttyqtauynda.
Kongreske Türkiia, Äzerbaijan, Özbekstan jäne Qyrǧyzstannan kelgen jetekşı ǧalymdar söz aldy. Olar būl şaranyŋ bükıl türkı jūrtyna ortaq ekenın mälımdep, ǧylymi zertteulerın bölıstı. 
"Şora Sarybaevtan ǧylymmen şynaiy ainalysudyŋ jolyn üirendık. Artynda qalǧan mūralaryn zerttei kele, onyŋ tek ǧylymǧa ǧana emes, ǧylymmen ainalysu ädıstemesıne de ülken üles qosqanyn körıp otyrmyz. Ol – naǧyz akademiialyq mekteptıŋ ökılı" – deidı ǧalymnyŋ şäkırtı Qalamqas Seidollaqyzy.
Is-şarada Şora Sarybaevtyŋ ǧylymi mūrasy jinaqtalǧan 6 kıtaptyŋ tūsauy kesıldı.
Aita keteiık, Şora Sarybaev 1925 jyly 2 nauryzda Taşkentte düniege kelgen. Onyŋ äkesı, Şamǧali Haresūly Sarybaev, qazaq tılı ädısnamasynyŋ negızın saluşylardyŋ bırı bolǧan.
Şora Sarybaev QazMU-dy 1950 jyly bıtırıp, 1953 jyly aspiranturasyn aiaqtaǧan. 1954-1995 jyldary A.Baitūrsynūly atyndaǧy Tıl bılımı institutynda Qazaq tılı tarihy men dialektologiiasy bölımınıŋ meŋgeruşısı qyzmetın atqarǧan. Ol qazaq tılınıŋ dialektologiiasy, leksikologiiasy, tıl mädenietı, qazaq ädebi tılınıŋ tarihy jäne qazaq-orys tıldık bailanystary salasynda tereŋ zertteuler jürgızgen.
Ǧalym qazaq tılınıŋ auyzşa söileu mädenietın zerttep, orys tılımen qarym-qatynasy nätijesınde paida bolǧan kırme sözderge taldau jasady. Sonymen qatar, türkologiia salasynda da auqymdy jūmystar atqaryp, qazaq tılın basqa türkı halyqtarynyŋ tılderımen salystyra otyryp zerttegen. 250-den astam ǧylymi maqalalary men oqulyqtary, monografiialary jaryq körgen. “Qazaq tılınıŋ qysqaşa etimologiialyq sözdıgı”, “Qazaq tılınıŋ dialektologiialyq sözdıgı”, “Jaŋa ataular sözdıgı” kıtaptarynyŋ qūrastyruşylardyŋ bırı. “Qazaqtyŋ aimaqtyq leksikografiiasy”,“Qazaq tıl bılımınıŋ bibliografiialyq körsetkışı” atty 6 tomdyq eŋbektıŋ jäne “Türkıtanu ädebietınıŋ bibliografiiasynyŋ” avtory. Şora Sarybaev 2018 jyly 93 jasynda ömırden öttı.
