Qysta qolaisyz aua raiyna bailanysty respublikalyq jäne oblystyq maŋyzy bar joldardyŋ qauıptı uchaskelerı jiı jabylady. Mūndai kezde atalǧan joldarmen jüruge uaqytşa tyiym salynady. Aua raiy talaptaryn elemei, tärtıp būzǧan jürgızuşılerge arnaiy şara qoldylady, dep habarlaidy «Adyrna» tılşısı Qazaqstan Media materialyna sılteme jasap.
Joldy jabudyŋ basty maqsaty – jürgızuşıler men jolauşylardyŋ qauıpsızdıgın qamtamasyz etu.
Qolaisyz aua raiynda jabylǧan jolǧa şyǧu QR ÄQBtK-nıŋ 667-baby («Zaŋdy talapqa baǧynbau») boiynşa 120 myŋ teŋgege deiıngı aiyppūl nemese 15 täulıkke deiın äkımşılık qamauǧa alu jazasyn qarastyrady. Jyl ışınde qaitalanǧan qūqyqbūzuşylyq üşın 15–20 täulıkke qamauǧa alu közdelgen.
Alaida kei sanattaǧy azamattarǧa äkımşılık qamau qoldanylmaidy. Bıraq būl jaǧdaida jürgızuşıge aiyppūl bırneşe ese artady. Ol 196 600 teŋgenı qūraidy. Qamauǧa alynbaityn tūlǧalardyŋ arasynda jüktı äielder, 14 jasqa deiıngı balalary bar äielder jäne erler, kämeletke tolmaǧandar, I jäne II toptaǧy mügedektıgı bar azamattar, 58 jastan asqan äielder men 63 jastan asqan erler bar.
Joldyŋ jabyluy turaly şeşımdı «QazAvtoJol» qabyldaidy. Al IIM men TJM mamandary joldy jabuǧa jäne qauıpsızdıktı qamtamasyz etuge kömektesedı.
